Муус устар 3 күнүгэр Ил Түмэҥҥэ өрөспүүбүлүкэҕэ оҕону уонна ыччаты сиэр-майгы, духуобунас сыаннастарыгар иитии, бу боппуруоһу сокуонунан хааччыйыы туһунан парламентскай истии буолан ааста. Тэрээһиҥҥэ Ил Түмэн Бэрэссэдээтэлэ Алексей Еремеев кытынна. Мунньаҕы билимҥэ уонна үөрэххэ сис кэмитиэт бэрэссэдээтэлэ Антонина Григорьева ыытта.
Дойдуга бэриниилээх дьону иитэн таһаарарга киэҥ хабааннаах дьүүллэһиигэ норуот дьокутааттара, уопсастыбаннай диэйэтэллэр, үөрэх, култуура салаатын үлэһиттэрэ, муниципальнай тэриллиилэр, уопсастыбаннай түмсүүлэр бэрэстэбиитэллэрэ кытыннылар.
Арассыыйа утары арҕаа дойдулар куомуннаспыт кэмнэригэр үүнэр көлүөнэҕэ төрөөбүт дойдуга тапталы, бэриниилээх буолууну иитии хаһааҥҥытааҕар даҕаны сытыытык турар.
«Арассыыйа Бэрэсидьиэнэ Владимир Путин төрөөбүт дойдуга тапталтан, итэҕэлтэн, төрүт сыаннастартан, өбүгэлэрбит үгэстэриттэн хаһан даҕаны аккаастаныахпыт суоҕа диэбитэ. Бары күүспүтүн түмэн үүнэр көлүөнэни иитэргэ көдьүүстээх ньыманы тобулан таһаарыахтаахпыт», — диэн Антонина Григорьева киирии тылы эттэ.
СӨ үөрэҕин уонна билимин миниистирин бастакы солбуйааччыта Алевтина Аргунова сиэр-майгы, духуобунас сыаннастарыгар өрөспүүбүлүкэ бастакынан сокуон ылынарын бэлиэтээтэ. Кини патриотическай иитии туһунан сокуону 2022с. ылыммыттарын, итиэннэ 2019 с. Ил Дархан уурааҕа тахсыбытын, ону таһынан, 2021с. ыччаты иитиигэ кэнсиэпсийэ оҥоһуллубутун о.д.а. ааттаталаата. «Эркээйи эргиирэ» бырагыраама өрөспүүбүлүкэ оскуолаларыгар киирдэ.
Соторутааҕыта буолбут быһыыга-майгыга олоҕуран, оҕолор куттала суох буолууларын хааччыйыы сытыытык турарын иһитиннэрдэ. Ыччаты патриотическай иитиигэ байыаннай-патриотическай, спортивнай кулууптар, кадетскай кылаастар тэриллэн үлэлииллэрин билиһиннэрдэ.
Мунньах кыттыылаахтара РФ атомнай энергетикатын уонна цветной металлургиятын бэтэрээнэ, тиэхиньиичэскэй билим хандьыдаата, бэрэпиэссэр, СӨ духуобунаска Академиятын бочуоттаах академига Иоган Максимов эко духуобунас туһунан ааптарскай кэнсиэпсийэтин биһирииллэрин биллэрдилэр. Иоган Егорович Саха Сириттэн Новосибирскай куоракка үөрэнэр устудьуоннарга 20 тахса сыл устата куратор быһыытынан үлэлээбитэ.
Кини бырайыага хайдах үөскээбитин туһунан кэпсээтэ, айылҕа, киһи уонна уопсастыба алтыһыытын, ол иһигэр үөскүүр конфликт туохха тиэрдэрин сэһэргээтэ. Холобур, уопсастыба иһигэр өйдөспөт буолуу байыаннай өрө турууга кубулуйда. Киһи айылҕаны аҥаардастыы туһанар, алдьатар дьайыытын түмүгэр тулалыыр эйгэ уордайыытын көрүстүбүт, экология глобальнай кириизиһигэр чугаһаатыбыт. Онон эко-духуобунаска олоҕуран, айылҕатыбын харыстыах тустаахпыт.
Саха парламент саайта, ааптар Марианна Тартыкова
Василий Кононов хаартыскаҕа түһэриитэ.
