Сарсын Саха АССР, РСФСР уонна ССРС үтүөлээх тренерэ Дмитрий Коркин 95 сылыгар аналлаах көҥүл тустууга норуоттар икки ардыларынааҕы турнир саҕаланыаҕа. Күрэхтэһиигэ 15 дойдуттан уонна Арассыыйа 12 регионуттан спортсменнар кыттыахтара.
Бу туһунан бүгүн күрэхтэһии тэрийээччилэрэ иһитиннэрдилэр. Дмитрий Коркин турнирыгар аан дойду уонна Европа чемпионнара кыттыахтара. Саха сирин сүүмэрдэммит хамаандатын састаабыгар Виктор Рассадин, Константин Капрынов, Айаал Белолюбскай уонна да атын аатырбыт бөҕөстөр киирдилэр.
Арассыыйа спортивнай тустууга федерациятын көҥүл тустууга отделын начальнига Петр Юмшанов бэлиэтээбитинэн, Дьокуускайга 15 дойдуну түмэр уустук этэ.
Саха сирин физическэй култуураҕа уонна спорка миниистирэ Леонид Спиридонов бэлиэтээбитинэн, бириис пуондата аҕыс мөлүйүөн солкуобай. Чемпионнар 300 тыһыынча солкуобайы, иккистээбиттэр – 200 тыһыынча солкуобайы, үһүстээбиттэр – 100 тыһыынча солкуобайы ылыахтара. Чемпионнар тренердэрэ 100 тыһыынча солкуобайы ылыахтара. Аны кыайыылаахтарга норуоттар икки ардыларынааҕы кылаастаах спорт маастарын аатын иҥэриэхтэрэ.
