Улуу тренер Дмитрий Коркин аатынан XVI норуоттар икки ардыларынааҕы күрэхтэһии сэтинньи 14-15 күннэригэр Саха сирин киин куоратыгар буолуоҕа. Улахан күрэхтэһии үгэс курдук Россия уонна омук дойдуларын күүстээх бөҕөстөрүн түмүөҕэ диэн ЯСИА иһитиннэрэр.
ССРС, РСФСР уонна САССР үтүөлээх тренерэ Дмитрий Коркин аатынан норуоттар икки ардыларынааҕы турнир Саха сиринээҕи сүрүн тустуу турнира уонна аан дойду таһымнаах событие буолар. Онно үгэс курдук Олимпийскай оонньуулар сулустара, аан дойду, континент чемпионнара, кэскиллээх бөҕөстөр кытталлар.
Былырыын Саха сирин бэрэстэбиитэллэрэ Лев Павлов, Александр Авелов кыайыылаахтарынан буолбуттара. Маны сэргэ аан дойду чемпионнара Абасгаджи Магомедов, Ахмед Усманов, аан дойду чемпионатын призердара Магомед Курбанов, Евгений Жербаев, Олимпийскай оонньуулар кыттыылаахтара Виктор Рассадин уо.д. а. кыһыл көмүс мэтээли иилиммиттэрэ.
Саха сирин үгүс спортсмена аан дойду тустуутун сулустарын кытта киирсэр кыахтаныахтара. Турнир «Триумф» спортивнай комплекска сэтинньи 14-15 күннэригэр ыытыллыаҕа. Бу туһунан спортивнай бэлэмнэнии киинин телеграмма-ханаалыгар иһитиннэрдилэр.
