Амматтан төрүттээх режиссер Дмитрий Давыдов «Пугало» киинэтэ Арассыыйа киинэ тыйаатырдарыгар олунньу 18 күнүгэр көстүө.
Былырыыҥҥы «Кинотавр» кыайыылааҕа буолбут киинэҕэ сүрүн оруолу ырыаһыт Валентина Романова-Чыскыырай оонньуур. Кини артыыс оруолугар бастакы холонуута дойду фестивалыгар үрдүк сыанабылы ылбыта.
Киинэни «Про.взгляд» тэрилтэ прокаттыыр. «Пугало» дойду киинэ тыйаатырдарыгар, ол иһигэр Дьокуускайга, Саха сирин улуустарыгар көстөрүн таһынан, Норвегияҕа Тромсотааҕы норуоттар ардыларынааҕы киинэ фестивалыгар көстүө. Бу туһунан Дмитрий Давыдов иһитиннэрдэ.
Көстүбэт күүстэр, ыарыы, саха эмчитин туһунан киинэ Дмитрий Давыдов үһүс үлэтэ.
