Олунньу 22 күнүгэр Дьокуускайга «Дархан Уус» 15-с быыстапка буолла. Саха тимир уустарын сүрүн түгэнэ «Куруһаала» эргиэн киинигэр тэрилиннэ. Манна маастардар тимир ууһун ускуустубатын сэҥээрээччилэри кытта көрсүһэр, алтыһар кыахтаннылар, идэлээх дьону кытта сэһэргэстилэр, ыалдьыттар сөбүлүүр оҥоһуктарын атыыластылар.
Быйыл быыстапка үлэтигэр Усуйаана, Ньурба, Бүлүү, Алдан, Томпо, Таатта, Амма, Чурапчы, Уус Алдан, Мэҥэ Хаҥалас, Хаҥалас, Нам улуустарыттан уонна Дьокуускай куораттан 70-тан тахса тимир ууһун маастара кыттыыны ылла. Дьүүллүүр сүбэни биллиилээх тимир ууһа, СӨ баһылыгын «Үлэ Киһитэ» бириэмийэтин лауреата, норуоттар икки ардыларынааҕы быыстапкалар хас да төгүллээх кыайыылаахтара Сарыал Билюкин салайда.
Үгэс быһыытынан быыстапка сүрүн түгэнинэн быһах күрэхтэһиитэ буолбута. Кыайыылаахтарга былыргы уус «Кудай Бахсы» статуэткаларын, ону тэҥэ спонсордарбыт сыаналаах бириистэрин туттардылар. «Дархан Уус» быыстапка тэрийэр кэмитиэтин салайааччыта Никита Протодьяконов тэрийээччилэр ааттарыттан уонна тус бэйэтин аатыттан тимир уустарын үлэлэригэр өйөбүллэрин, интэриэстэрин иһин саха быһаҕын бары сыаналааччыларыгар, спонсордарга уонна билээччилэргэ барыларыгар махталын биллэрдэ. Үөрүүлээх аһыллыыга Дьокуускай куорат баһылыгын социальнай боппуруостарга солбуйааччыта, «Таатта» түмсүү салайааччыта Владимир Аржаков уонна тимир ууһа, этнограф, Таатта улууһун Баайаҕа нэһилиэгин бэрэстэбиитэлэ Николай Егоров-Байаҕыын. Баайаҕа нэһилиэгэр 2026 сыллаахха өрөспүүбүлүкэтээҕи тимир уустарын ыһыаҕа буолуоҕа.
Быыстапка ыалдьыттара «Мандар Уус» музейнай комплекс саамай бөдөҥ саха быһаҕын көрөр-истэр, таарыйар кыахтаннылар, ону тэҥэ режиссер Дмитрий Никонов «Айанньыт» («Путник») диэн биллиилээх тимир ууһа, философ, айанньыт Борис Неустроев-Мандар Уус олохторугар анаммыт документальнай киинэтин көрөр-истэр кыахтаннылар.
Быыстапка чэрчитинэн сытыылааһын уонна лазерынан суруйуу өҥөтө оҥоһулунна.
Саха сирин тимир уустарын “Дархан Уус” сүрүн быыстапката Дьокуускайга 2010 сылтан сыл аайы ыытыллар уонна быыстапканы төрүттээччи Серафим Валерьевич Попов кэриэһигэр ананар. Өрөспүүбүлүкэ тимир уустарын сүрүн форумун көҕүлээччилэринэн аныгы саха тимир ускуустубатын патриарха, СӨ духуобунаһын Академиятын академига, П.А. Ойуунускай аатынан судаарыстыбаннай бириэмийэ лауреата Борис Неустроев — Мандар Уус и саха куухунатын маэстрота, Франция кулинариятын Академиятын бочуоттаах академига, А.Е. Кулаковскай аатынан судаарыстыбаннай бириэмийэ лауреата Иннокентий Тарбахов буолаллар.
Куонкурус бырагырааматын түмүктэрэ
«Бастыҥ уус-уран быһах»
Дьүүллүүр сүбэ: Сарыал Билюкин, Роман Готовцев — Мындыр Уус, СӨ тимир уустарын Сойууһун бэрэссэдээтэлэ Александр Данилов — Хаҥыл Уус.
(12 кыттааччы):
1-кы миэстэ — Сандал Мордосов (Дьокуускай);
2-с миэстэ — Николай Томскай (Усуйаана улууһа);
3-с миэстэ — Айысхаан Данилов (Таатта улууһа).
«Куухуна бастыҥ быһаҕа»
Дьүүллүүр сүбэ: Константин Матаннанов, «Тыгын Дархан» ресторан шеф-повара (салайааччы), Николай Атласов, Евгений Петров, Иван Решетников – «Тыгын Дархан» ресторан повардара.
(54 кыттааччы):
1-кы миэстэ — Айысхаан Данилов (Таатта улууһа);
2-с миэстэ — Александр Борисов (Мэҥэ Хаҥалас улууһа);
3-с миэстэ — Федор Неустроев (Таатта улууһа).
«Барытыгар туттуллар быһах»
Дьүүллүүр сүбэ: Сарыал Билюкин, Роман Готовцев-Мындыр Уус, Александр Данилов — Хаҥыл Уус уонна Василий Попов — Бааха Уус.
Экспертэр: Леонид Говоров, Елисей Баишев.
(48 кыттааччы):
1-кы миэстэ — Гаврил Мохначевскай (Таатта улууһа);
2-с миэстэ — Альберт Захаров (Томпо улууһа);
3-с миэстэ — Александр Борисов (Мэҥэ Хаҥалас улууһа).
Ааптар: Гаврил Андросов
Владимир Григорьев хаартыскаҕа түһэриитэ.
