«Далбар Хотун» кэрэ аҥаардарга аналлаах сурунаал дьон-сэргэ биһирэбилин ылбыт «Далбар Хотун» өрөспүүбүлүкэтээҕи күрэһэ 2024 c. XIV төгүлүн ыытыллар. Эһиилги күрэспит Россияҕа дьиэ кэргэн сылыгар уонна сурунаал тэриллибитэ 30 сыллаах үбүлүөйүгэр ананар.
Буолаары турар күрэс сүрүн уратыта – телевизионнай киэбинэн ыытыллыыта. Күрэһи “Саха” НКИХ хампаанньа өйөөн, “Сахабэчээти” кытта бииргэ ыытар. Онон өрөспүүбүлүкэ бүттүүнэ күөх экранынан көрөн, бэйэлэрин улуустарын далбар хотуннарыгар “ыалдьан” куоластыыр кыахтаналлар.
Маны этэн туран, улуускут чиэһин көмүскүүр, тыа ыалын олоҕун укулаатын өйүүр, бөҕөргөтөр сыаллаах күрэскэ кыттааччыгытын балаһыанньа (Dalbar.ru сайтан көрүҥ) ирдэбилигэр сөп түбэһиннэрэн, өйөөн-тэрийэн ыытыаххыт диэн эрэнэбит.
Сүрүн бириис – үгэс курдук тыраахтыр!
Сайаапкалары ахсынньы 25 күнүттэн тохсунньу 31 күнүгэр диэри dalbar2010@mail.ru аадырыска күүтэбит.
