17 От ыйа 17.07
  • 20°
  • $ 88,28
  • 96,26

Дьабыылга ыччат нэдиэлэтэ түмүктэннэ

15:15, 20 ноября 2018
Текст:
Читайте нас на
Яндекс Новости
ЯДВ

Сэтинньи ыйга Дьабыыл нэһилиэгэр «Аартык» түмсүү ыччакка аналлаах нэдиэлэтэ түмүктэннэ. Ол чэрчитинэн сэргэх, үтүө тыыннаах тэрээһиннэр буолан аастылар.


Дьабыыл ыччаттар түөрт хамаандаҕа арахсан биэс түһүмэҕинэн остуол тенниһигэр, «Бэйэ оҥоһуга» дьаарбаҥкаҕа, П.А.Ойуунускай төрөөбүтэ 125 сылыгар аналлаах «Илбистээх тыла ньиргийэр, тостор тойуга чугдаарар» уус-уран ааҕыыга, «Нэһилиэгим сайдар кэскилэ» бырайыагы көмүскээһиҥҥэ уонна үтүө дьыаланы оҥорууга кытыннылар. Нэдиэлэни успуорт оонньууларынан арыйдылар.

Остуол тенниһигэр күрэхтэһиигэ Дария Романова бастаата, Семен Аммосов, Данил Прокопьев иккис-үһүс миэстэни ыллылар. «Бэйэ оҥоһуга» дьаарбаҥкаҕа минньигэс ас эгэлгэтин астаан, оҥоһуктары бэлэмнээн нэһилиэнньэҕэ атыыга таһаардылар. Хамаандалар төһө элбэх харчыны киллэриммиттэринэн кыайыылааҕы быһаардылар.

Бибилэтиэкэр Наталья Алексеева тэрийбит «Илбистээх тыла ньиргийэр, тостор тойуга чугдаарар» ааҕыы куонкуруһугар хамаандаттан иккилии ааҕааччы кытынна. Софья Прокопьева, Надежда Саввинова, Афанасий Березин, Раиса Семенова кыайыылаахтарынан буоллулар. Надежда Егорова «Иэйиилээх ааҕааччы», Георгий Петров «Сэргэх ааҕааччы», Варвара Березкина «Толкуйдаах ааҕааччы», Игорь Семенов «Төлөннөөх ааҕааччы», Анастасия Винокурова «Астык ааҕааччы» анал ааттарынан бэлиэтэннилэр. Көрөөччү биһирэбилин Игорь Семенов ылла.

Хамаандалар үтүө дьыаланы оҥорууга кытыннылар. Ол курдук, «Байдам» маҕаһыыҥҥа «Үтүө санаа долбуурун» оҥорон бородууктаны ылан уурдулар, нэһилиэк кырдьаҕастарыгар, элбэх оҕолоох ыалларыгар анаатылар. Нэһилиэк бибилэтиэкэтигэр оҕо кинигэлэрин бэлэхтээтилэр, алын кылаас үөрэнээччилэригэр «Чуораанчык» сурунаалга суруйтардылар.

«Нэһилиэгим сайдар кэскилэ» бырайыактары толкуйдаан көмүскээтилэр. Дьарыктаах буолуу киинин, нэһилиэккэ уопсай баанньыгы тэрийэргэ, таҥас сууйар дьиэни тутарга, Учуутал искибиэрин оҥорууга былааннарын көрдөрдүлэр.

Нэдиэлэ түмүгэр ыччаттар түмсэн нэһилиэнньэҕэ сэргэх кэнсиэри көрдөрдүлэр, кыайыылаахтары эҕэрдэлээтилэр. Кыайыылаах хамаанда хамандыыра Софья Прокопьева, «Үтүө санаалаах хамаандаттан» Варвара Березкина, «Булугас өйдөөх хамаандаттан» Надежда Саввинова, «Көхтөөх хамаандаттан» Фекла Аммосова ааттаннылар.

Ааптар: Наталья КИРЕНСКАЯ

Следите за самым важным и интересным в Telegram-канале и WhatsApp-группе ЯСИА