17 От ыйа 17.07
  • 19°
  • $ 88,28
  • 96,26

Дьааҥыга ыытыллар Олоҥхо Ыһыаҕар бэлэмнэнии үгэнэ

12:01, 19 мая 2016
Текст:
Читайте нас на
Яндекс Новости
ЯДВ

Олоҥхо Ыһыаҕын буолар күнэ күнтэн-күн чугаһаан иһэр. Бу хаалбыт аҕыйах күн иһигэр былааҥҥа киирбит үлэ барыта кэмигэр бүтэн, ыһыахпыт үрдүк таһымнаахтык ыытыллара олохтоохтортон биһигиттэн эрэ тутулуктааҕын өйдүүбүт, бары да долгуйабыт.


Бүгүҥҥү күҥҥэ уопсай тэрээһин үлэтигэр туох ыытылла турарын Олоҥхо Ыһыаҕын дириэксийэтин салайааччыта Михаил Рожин иһитиннэрэр:

— Ыһыахпыт ыһыллар мааны түһүлгэтэ олохтоноро аҕыйах күн хаалла. Бу хаалбыт кэмҥэ ыытыллар үлэ өссө күүскэ тэтимнээхтик бара турар. Билиҥҥи туругунан уопсай тэрээһин боппуруостара быһаарыллаллар. Ол курдук, 1460 киһини түһэрэр объектаахпыт. Ас-үөл өттүгэр сүрүн эппиэттээх Екатерина Портнягина салайааччылаах «Тымныы Чыпчаала» ТХПК үлэлэһэ сылдьар.

Ыһыах тэрээһинигэр үлэлиир сүүрбэ биир хамыыһыйабыт үлэтэ үчүгэй. Бүгүҥҥү күҥҥэ тутууг үлэ үгэнэ. Хоптолоох хонуутугар үгүс саҥа тутуулар дьэндэйэн тахсан эрэллэрэ киһи сүргэтин көтөҕөр, астыннарар. Култуурунай маассабай өттүгэр Е.В. Ноговицына салайааччылаах култуура ыытар үлэтэ балтараа сыл анараа өттүттэн эрдэттэн барыта быһаарыллан, кэмигэр барыта силигин ситэн, таһымнаахтык ыытыллыа диэн эрэнэбит. Дьааҥы олохтоох дьонун аҕалтарарга үс сүүс киһиэхэ чэпчэки сыаналаах субсидированнай билиэт атыыга тахсыбыта. Онно чуолкай ыйылла сылдьар — Дьааҥыбыт оройуонун бочуоттаах олохтоохторо, устудьуоннар, волонтёрдар, тутар этирээттэр туһанар кыахтаахтар. «Талбыт киһи атыылаһар кыахтаах» диэн интэриниэт ситимигэр тахсыбыт сонун сымыйа сураҕынан ааҕыллар. Кимнээх, хаһан, хас чааска айаннаан кэлэллэрэ чуолкай сурулла сылдьар. Бу билиэт Дьокуускай куоракка Курашова уулуссатын сүүрбэ иккис дьиэтигэр атыыланар. Бу чэпчэтиилээх билиэтинэн туһанарга ыҥырыылаах ыалдьыттар Ньурбаттан Д. Томская – Чаайка сиэннэрэ, Польшаттан кэлэн иһэр Серошевскай сиэннэрэ киирдилэр.

Күүстээх үлэ спонсорство өттүгэр ыытыллар. Ол курдук, бириис пуондатыгар биирдиилээн да дьоммут, тэрилтэлэр да туруналлара хайҕабыллаах эрэ суол. Пуондаҕа «Анал» бириис туруорааччылар бааллар. Ол курдук, Боруулаахтан төрүттээх тыыл бэтэрээнэ Е.С. Неустроева ат сүүрдүүтүгэр аҕатын аатынан анал бириис олохтоору бэйэтин биэнсийэтиттэн уон тыһыынча солкуобайы аҕалан туттарда. Бу курдук пуондабыт анал бүддьүөтү таһынан бириискэ күннээҕи хамнаһынан, тэрээһиннэринэн, ким тугу биэрэринэн туолан иһэр. Билигин да кэм-кэрдии баар. Бу хаалбыт кэмҥэ бириискэ көмө-тирэх буолуон баҕалаахтар кыттыҥ диэн ыҥырабыт!

Маны сэргэ ыһыах ыһыллар түһүлгэтигэр төрүттэрбит да үөрэхтэриттэн, үрдүк айыылар орто дойдуга түһэр кэмнэригэр кутуруктаах кыыл-сүөл суох буолуохтаах диэн сиэринэн салайтаран, Дьааҥыбыт сиригэр көрүүтэ суох сылдьар ыттары бохсуу түмүгэр, бэйдиэ сылдьар ыттар биллэ аҕыйаатылар. Ону сэргэ бу ый 20 күнүгэр улууспут аҕа баһылыга В.Г. Павлов бука бары олохтоохтору субуотунньукка ыҥырда. Онон, олорор сирбитин ырааһырдыыга бары биир сомоҕо буолан кыттыыны ылан, кэлиэхтээх ыалдьыттарбытын ыраастык көрсөрбүт наадата биллэр.

Ыһыахха ыытыллар өрөспүүбүлүкэ таһымнаах спортивнай бырагыраама барыта таҕыста, култуура өттүгэр бырагыраама эрдэ оҥоһуллан, бигэргэнэрэ эрэ хаалла.

Тус бэйэм санаабар, Ыһыахпыт түстэнэр түһүлгэтэ барыта оҥоһуллан бэлэм буоллаҕына, ыалдьыттарга да, бэйэбитигэр да кэбэҕэс буолсу диэн көрдүм. Киин сирдэргэ ыһыах түһүлгэтигэр атыы-тутуу, күрэхтэр буолар сирдэрэ тэйиччи турар эбит буоллахтарына, биһиги түһүлгэбитигэр барыта бэйэ-бэйэтиттэн чугас, кэккэлии турар буолан тахсыыта астыннарар.

Күрэхпит биир саамай сүрүнүнэн ат сүүрдүүтэ буолуоҕа. Дьааҥылар төрүт-төрүкүттэн сахабыт сылгытынан аатырбыт дьон буоларбыт быһыытынан, бу күрэх таһымнаахтык ааһарыгар ураты болҕомтобутун уурабыт. Биллэрин курдук, ат сүүрдүүтүн бирииһэ үчүгэй, онон кыттыан баҕалаахтары күүтэбит!

Маннык таһымнаах түһүлгэ төрүттэнэрэ үчүгэй эрэ өрүттээх. Ол курдук, Дьааҥы куоратын айанын суолугар муоста тутуллар, суол-иис өрөмүөннэнэр, ыһыах ыһыллар мааны сирэ тутуллар, Дьааҥы куоратыгар кулууп өрөмүөнэ, оҕо саадтара, оскуолалар, оҕо ускуустубатын дьиэтин тутуута барыта ситэн таҕыстаҕына, биһиги барыбыт астыныыта, киэн туттуута буолуоҕа. Онон, биир дойдулаахтарбын өрөгөйдөөх Олоҥхо Ыһыаҕа ыытылларынан, биир сомоҕо буолан, хаалбыт кэмҥэ күүскэ турунуохха, үлэлиэххэ-хамсыахха диэн ыҥырыыбын тиэрдэбин!

Следите за самым важным и интересным в Telegram-канале и WhatsApp-группе ЯСИА