16 От ыйа 16.07
  • 23°
  • $ 87,81
  • 95,78

«Дьүкээбил дьиримниир суһума» икки улуус түһүлгэтэ түстэннэ

13:39, 11 апреля 2018
Текст:
Читайте нас на
Яндекс Новости
ЯДВ

Муус устар 4 күнүгэр А.Кулаковскай аатынан норуоттар доҕордоһууларын дьиэтигэр, ырыа куттаах хоһоонньуппут, 50 – ча кинигэ ааптара, Дьааҥы, Хаҥалас улуустарын бочуоттаах гражданина, дэҥҥэ көстөр, күндү күтүөппүт Христофор Петрович Горохов – Элгэстэй 80 сааһыгар аналлаах «Дьүкээбил дьиримниир суһума» диэн ааттаан олус иһирэх дьоро киэһэтэ икки улуус дьонун түмтэ.


Өрүү буоларын курдук айар киэһэни иилээн – саҕалан ыыттылар Гороховтар дьиэ кэргэн эрэлээх ыытаччылара, телевиденияҕа уонна араадьыйаҕа биллэр – көстөр ыытааччылар Альбина Тарабукина уонна Эдуард Рудых.

Дьоро киэһэ Элгэс олохтоохторун сылаас тыынаах алгыстарынан уонна истиҥ – иһирэх эҕэрдэлэринэн саҕаланна.

Өктөм народнай тыйаатырын артыыстара уонна Култуура коллеһын устудьуоннара Х.П.Горохов күн сырдыгын көрбүт күнүн, оҕо сааһын олус итэҕэллээхтик толордулар, Христофор Петрович чорос сааһын оонньоон толордо Христофор Петрович сиэнэТиит – Арыы 9 кылааһын үөрэнээччитэ Айсен Горохов бэйэтигэр олус майгынныыр оҕо толорон, бары да сонньуйдубут. Туруорааччы өрөзөссүөрүнэн үлэлэстэ биир дойдулаахпыт Жөппөнтөн төрүттээх эдэр – кэскиллээх өрөзөссүөр, Култуура куоллеһын преподователя Айдыс Черноградскай.

Бу күн Х.П.Горохов хоһоонноругар айыллыбыт ырыаларын толордулар олохтоох мелодистар Михаил Атласов, Алексей Калининскай, Исай Брызгалов, концеры киэргэттилэр Саха эстрадатын сулустара, эстада аксакааллара Владимир Татаринов.Алексей, Екатерина Егоровтар, Василий Еримеев, Павел Семенов, Константин Степанов, Николай Слепцов, Алена Яковлева, Милена Борисова, “Туймаада” вокальнай ансаамбыла, Хаҥаластан киэҥ эйгэҕэ тахсан эрэр ырыа куттаах хоһоонньут Галина Иванова – Айтыына, Лидия Харитонова, эдэр эрчимнээх ырыаһыттарбыт Х.П.Горохов тылыгар, Милена Борисова матыыбыгар «Эдэр ыччат» өрөгөй ырыатын өрө көтөҕүллэн туран толордулар. Дьааҥыттан эҕэрдэ ырыаларын анаатылар Анна, Михаил Рожиннар, Раиса Чирикова уонна ХИФУ өрөгөй ырыатын А.Калининскай салайыытынан ыллаан дьиэрэһэттилэр үрдүк кыһа устудьуоннара уонна Хатас дьахталларын ансаамбыла.

Бу күн юбилярга Дьааҥылар култуура салалтатын аатыттан дьөһөгөй бэлэҕиттэн оҥоһуллубут, маамонт муоһа тутаахтаах дэйбиири Дьааҥы улууһун култууратын салайааччыта В.П.Стучков хомуһуннаах тылларын анаан туттарда, Верхоянскай куорат 380 сааһын күнүн көрсө, үтүө киһилэригэр куорат бочуоттаах гражданинын аатын иҥэрбиттэрин туһунан улуус баһылыгын солбуйааччыта дөкүмүөн туттарда, Хаҥаластар култуура аатыттан харысхал уонна Хаҥалас улуһун сайдыытыгар, кылаатын иһин бэлиэ знагын үөрүүлээх быһыыга туттардылар, салайааччыбыт С.В.Громова Христофор Горохов хоһоонун өйүттэн өрө көтөҕүллэн туран ааҕан, эҕэрдэтин түмүктээтэ. Суруйааччылар союһун аатыттан Афанасий Гуринов – Арчылаан Сергей Васильев – Борогонскай аатынан түөскэ иилиллэр

бэлиэни туттардылар, «Ил — Түмэн» аатыттан эҕэрдэлээтэ уонна сэмэй бэлэҕин туттарда, өр сыл бииргэ үлэлэспит, биир дойдулаахпыт А.Н.Ким – Киим Кимэн.

Бу өйдөөтөххө Христофор Горохов Александр Николаевичка олус да бэргэн (магическай) ааты иҥэрэн Ким Кимэммит дуоһунаһа үрдээн иһэриттэн биир дойдулаахтара киэҥ туттабыт.

Дьоро киэһэни үҥкүүннэн киэргэттилэр “Эркээни эдэр сааһа” народнай үҥкүү кэллэктиибэ салайааччы В.Е.Романова, үҥкүүнү туруорааччы хореограф Ульяна Харина, Х.П.Горохов олоҕун аргыһын Е.М. Горохова – Чөмчүүк оҕуруоннан тиспит кэрэ оҥоһуктарын кэтэн хааман долгулдьуттулар ХИФУ кэрэ куолара. Дьоро киэһэ ааптары кытта ыкса сибээтээхтик, диалог быһыытынан ааһан олус сэргэхтик, истиҥник ааста уонна экраҥҥа кини олоҕун кэпсиир хаартыскалар, видио – сюжеттар көстөн биэчэри өссө тупсардылар.

Библиотекабыт үлэһиттэрэ Х.П.Горохов кинигэлэрин киэҥ көрүүгэ туруордулар, юбиляр сценаарыын суруйан, остуолун ыытан абыраатылар. Култуурабыт үлэһиттэрэ Х.П.Горохов дьиэ кэргэнинээн, бары биир дьиэ кэргэн курдук айымньылаахтык үлэлээбиттэрин түмүгэр олус иһирэх, сэргэх концерт ааһан, көрөөчүлэр дуоһуйан тарҕастылар, Гороховтар дьиэ кэргэнэ барыбытыгар барҕа махтал тылларын анаатылар.

Манна диэн эттэххэ Дьокуускайга дьоро киэһэ тэрийэр олус ороскуоттаах буолааччы, ол да буоллар үтүө амарах саналаах дьоннордоох буоламмыт, Кулаковскай доҕордоһууларын киинин үлэһиттэрэ үгүс чэпчэтиилэри оҥорбуттарыгар бу тэрилтэ хаһаайкатыгар Яна Викторовна Игнатьеваҕа уонна дьону түмүүгэ сүҥкэн улахан күүс – көмө буолбут биир дойдулаахпытыгар Светлана Рафаиловна Никифороваҕа, транспортарынан хааччыйбыт Улууспут администрациятыгар, Колледж, ХИФУ устудьуоннарыгар, бары тэрийээчилэр ааттарыттан барҕа махталбытын тиэрдэбит.

Инникитин даҕаны айылҕаттан айдарыылаах, ырыа куттаах бэйиэппит кини баар суох көмүс чөмчүүк доҕорунаан сыламныыр күнү көрсөн, өссө да айа – тута сылдьыҥ, саҥа хоһооннору айан, ырыа буолан көтүтэн, саҥа сулустары уматан сырдыкка – кэрэҕэ сирдии туруҥ, үтүө бэйэлээх үлэһит дьоммутун сырдатан, үтүө ааттарын ааттарын көмүс сурукка киллэриҥ, айылҕабыт кэрэтин хоһуйан, кэрэҕэ – үтүөҕэ сирдээн диэн алгыспын аныыбын.

Лидия Харитонова.

Следите за самым важным и интересным в Telegram-канале и WhatsApp-группе ЯСИА