14 От ыйа 14.07
  • 21°
  • $ 87,74
  • 95,76

Чурапчы, Таатта сэлиэнньэлэрэ ууга барар кутталлаахтар

19:05, 10 мая 2018
Текст:
Читайте нас на
Яндекс Новости
ЯДВ

Бүгүн “Ми-8” бөртөлүөттэр Дьокуускайтан Аммаҕа муус харбытын дэлби тэптэрэ көттүлэр. Ону таһынан, ас-үөл, бурдук, эмп-томп, иһэр уу саппааһын тиксэрдилэр. Суотабай сибээс быстыбытын холбуурга тустаах үлэһиттэр тиийдилэр. Дизельнай электростанция олохтоохтору уотунан хааччыйыахтаах.


«Ыам ыйын 7-8 күннэригэр кэтэспэтэх өттүттэн уу эмискэ кэлэн, ыам ыйын 10 күнүгэр сарсыарда 6ч. туругунан 658 киһи (онтон 252 оҕо) олорор 241 тиэргэнэ ууга барда. 395 киһи олорор 150 дьиэтэ халаан уутугар уһунна. Алта социальнай суолталаах эбийиэк былдьанна. Улуус киинигэр Амматааҕы нефтебаза, сөмөлүөт түһэр хонуута, метеостанция, пилорама, полуфабрикат астыыр сыах ууга бардылар.

Амма суолун түөрт учаастагын халаан уута быһан, ЫББМ үлэһиттэрэ дьуһуурунайдаан, дьон ууну туорууругар, нэһилиэнньэлээх пууҥҥа тиийэригэр көмөлөһөллөр”, — диэн нэһилиэнньэ олоҕо-дьаһаҕа куттала суох буолуутун хааччыйар судаарыстыбаннай кэмитиэт салайааччыта Юрий Зайцев иһитиннэрдэ.

Олохтоохтору уу ылар сириттэн көһөртөөтүлэр, эвакуационнай пуун тэриллибитэ даҕаны, дьон аймахтарынан тарҕастылар.

Сарсыарда 6ч. ыам ыйын 10 күнүнээҕи туругунан уу таһыма 1076 см.

1980 сыллаахха историяҕа киирбит улахан халаан уута муҥутаан 1084 см. тиийэ сылдьыбыта.

2018 с. ыам ыйын 8 күнүгэр бастакы учаастактар ууга барбыттарын кэннэ муус харыытын дэлби тэптэрэргэ бөртөлүөттэр тиийбиттэрэ. Амматтан 13 км. аллараа бастакы дэлби тэптэрии буолбута. Ыам ыйын 9 күнүгэр биэс рейс оҥоһулунна.

“Соморсун сэлиэнньэтин аттыгар 3 км. муус харыытын аһарарга 2,5 туонна ыйааһыннаах дэлби тэптэрии оҥоһулунна. Ол эрэн, уу таһыма түргэнник түспэт сүрүн төрүөтэ – өрүс араастаан эриллэ-эриллэ барар сиригэр арыылар, хомолор бааллар, онно муус халҕаһата киирэн устубакка турар”, — диэн Юрий Зайцев быһаарда.

Ыксаллаах быһыыны-майгыны туоратарга улууска Бырабыыталыстыба бөлөҕө уонна ЫББМ үлэһиттэрэ үлэлииллэр.

Бу күннэргэ Амма өрүс аллараа сүүрүгэр Мээндиги, Чурапчы улууһун Мындаҕаайы сэлиэнньэтэ, Тааттаҕа үс нэһилиэк ууга барар кутталлаах. Нэһилиэнньэни сэрэтэр үлэ ыытыллан, баайдарын-дуолларын кураанах сиргэ көһөрөллөрүгэр сүбэлээбиттэрэ.

Марианна ТЫРТЫКОВА, «Саха сирэ», edersaas.ru

Следите за самым важным и интересным в Telegram-канале и WhatsApp-группе ЯСИА