Өрөспүүбүлүкэтээҕи быыбар киин хамыыһыйата Госдума дьокутааттарын быыбарын бүтэһиктээх түмүгүн таһаарда.
Балаҕан ыйын 18 күнүгэр дойдуга бүтүннүүтүгэр Госдума быыбара буолан ааста.
«Дойду олоҕор улахан суолталаах бу тэрээһиҥҥэ 304145 быыбардааччы — 48,11% кытынна. Болдьоҕу иннинэ куоластаабыт дьон ахсаана 6869 киһи», — диэтэ Быыбар киин хамыыһыйатын бэрэссэдээтэлэ Анатолий Кривошапкин.
Кини этэринэн быыбары тэрийиигэ үҥсүү, куоластааһын түмүгүн туһунан саарбахтааһын тахсыбатах.
Саха сирэ «Биир ньыгыл Арассыыйа» баартыйаны өйөөтө. Баартыйа иһин 141128 киһи куоластаабыт — 46,42%. Иккис миэстэни «Сиэрдээх Арассыыйа» — 15,20%, үсүһү – РФКП — 14,35%, төрдүһү — РЛДП — 10, 70%.
Атын баартыйалар 5% итэҕэһи ылбыттар.
Биир мандааттаах уокурукка кыайыылааҕынан Федот Тумусов буолла. Кини иһин 112 тыһ. киһи – быыбардааччы 37,52 % куоластаабыт. Кини кэнниттэн Олег Тарасов («Родина» баартыйа) – 20,45%, Петр Аммосов (РФКП) – 15,47%, Гаврил Парахин (РЛДП) – 6,80%, Айсен Тихонов (Үүнүү баартыйата) – 4,48%, Александр Лазарев (Арассыыйа хомуньуустара) – 3,92%, Айтал Ефремов («От күөхтэр» баартыйа) – 3,72%, Андрей Заякин («Дьаабылыка”) – 2,95%.