Ил Түмэҥҥэ олунньу 20 күнүгэр “Анал байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр социальнай өйөбүл миэрэлэрэ” диэн бырабыыталыстыба чааһа ыытылынна, суруйда Саха парламент саайт.
Мунньаҕы Ил Түмэн байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэтин бэрэссэдээтэлэ – Ил Түмэн Бэрэссэдээтэлин солбуйааччы Александр Подголов иилээн-саҕалаан ыытта. Кыттыыны миниистирдэр, биэдэмэстибэлэр салайааччылара, норуот дьокутааттара, анал байыаннай дьайыы кыттыылаахтара, дьиэ кэргэттэрин чилиэттэрэ, үтүө көмөһүттэр ыллылар.
Мунньах саҕаланыыта Александр Подголов мустубут эр дьону, байыаннай званиелаах кэрэ аҥардары кэлэн иһэр ийэ дойдуну көмүскээччилэр күннэринэн эҕэрдэлээтэ:
— Бүгүҥҥү биһиги көрсүһүүбүт ис хоһооно чопчу. Анал байыаннай дьайыы кыттыылаахтарыгар уонна кинилэр дьиэ кэргэттэригэр социальнай өйөбүл тула биһиги тиһигин быспакка көрсөн кэпсэтэбит, кыһалҕалары ырытабыт, быһаарсабыт. Бүгүҥҥү күҥҥэ турар балаһыанньаны билсиэхпит, буойуттарбытыгар көмө хайдах тиийэрин, туох ыарахаттары көрсөллөрүн истиэхпит. Бу сыллар усталарыгар элбэх үлэ ыытылынна эрээри, баар кыһалҕаларга харахпытын симэр табыллыбат. Былаас уорганнарын биир сүрүн садаачата – хас биирдии дьиэ кэргэн кыһалҕатын билии, билсии, ону быһаарааһын, — диэн эттэ.
Сүрүн дакылааты бырабыыталыстыба бэрэссэдээтэлин солбуйааччы Георгий Степанов туруорда. Кини иһитиннэрбитинэн, Сахабыт Сиригэр анал байыаннай дьайыы кыттыылахтарын уонна кинилэр дьиэ кэргэттэрин өйөөһүҥҥэ уопсаса 44 эрэгийиэн, 9 муниципальнай миэрэ олохтоммут. 2022 сылтан маныаха 20 млрд. солкуобайтан тахса үп көрүллүбүт, олортон олохтоох бүддьүөттэртэн 1,7 млрд. солк.
Мунньах кэнниттэн Георгий Михайлович кылгас кэмэнтээрий биэрдэ:
— Анал байыаннай дьайыы кыттыылаахтарын уонна кинилэр дьиэ кэргэттэрин өйүүр дьаһаллар биһиги өрөспүүбүлүкэбит салалтата, бырабыыталыстыбата өрүү үрдүк болҕомтоҕо илдьэ сылдьар үлэтин хайысхата буолар. Ол чэрчитинэн бүгүн Ил Түмэн дьокутааттара Бырабыыталыстыба чааһын тэрийдилэр. Сүрүн сыаллар-соруктар өрөспүүбүлүкэ сокуоннарынан уонна Ил Дархаммыт ыйаахтарыран бигэргэтиллэн тураллар. Ол курдук, 80-с ыйааҕынан 44 өрөспүүбүлүкэ, 9 муниципальнай таһымнаах миэрэлэр ылыллан тураллар. Ол иһигэр мэдиссиинэ, социальнай өттүнэн реабилитациялааһын.
Көмө миэрэлэрэ кэҥииллэр. Былырыыҥҥаттан анал байыаннай дьайыы бэтэрээннэрин куортамҥа бэриллэр анал социальнай дьиэлэринэн хааччыйыы киирдэ.
Мунньах устата элбэх боппуруос киирдэ. Дьокутааттарбыт уонна АБДь кыттыылаахтара ситэ быһаарыллыбакка турар кыһалҕаларга тохтоотулар. Холобур, тиис протезтааһын үбүлээһинигэр, босхо бэриллэр сир учаастагын бэрээдэгэр, инфраструктуранан хааччыйыытыгар.
Инниктин даҕаны биһиги дьокутааттары кытары сөбүлэһэн, өйөбүл араас миэрэлэрин дириҥэтэн, кэҥэтэн иһиэхпит. Уонна бу миэрэлэр булгуччу бэтэрээннэрбитигэр, кинилэр дьиэ кэргэттэригэр тириэрдиллэллэрин ситиһиэхпит.
