Советскай Союз Геройа Федор Охлопков аатынан ыраах дистанцияларга ытыыга бүтүн Россиятааҕы турнир Россияҕа бастыҥнартан биирдэстэринэн буолар. Бу аэропорка көрсүүттэн саҕалаан, күрэхтэһиигэ идеальнай бэлэмнэниини кытта сибээстээх. Маннык санааны ЯСИА-ҕа Иркутскайтан уонна Саратовтан төрүттээх снайпер бырааттыылар Антоновскайдар биллэрдилэр.
Ыраах дистанцияҕа ытыыга рурнир Россия регионнарыттан 120-чэ бэйэтин дьыалатыгар маастары түмтэ. Олор ортолоругар анал байыаннай дьайыы кыттыылаахтара, байыаннайдар уонна гражданскай дьон бааллар.
Күрэхтэһии түмүгүнэн «Күн» түһүмэххэ снайпер бырааттыылар Александр уонна Сергей Антоновскайдар боруонса мэтээллэри ыллылар. Кинилэр тыҥааһыннаах киирсиигэ бастыҥнар ахсааннарыгар киирэр кыахтаннылар. Кинилэргэ тэрийээччилэр саҥа снайпер бинтиэпкэтин уонна 500 тыһыынча солкуобайдаах сертификаты туттардылар.
«Охлопков турнира Россияҕа биир бастыҥ, идеальнай бэлэмнээх диэн мэлдьи этэр этим. Барыта аэропорка көрсүһүүттэн саҕаланар. Кэлээт, дьоҥҥо-сэргэҕэ болҕомтону тута билэҕин: баннердар, кыргыттар национальнай астаах-үөллээх көрсөллөр, оптуобустар олорор дьиэлэргэр тиэйэллэр, барыларын кэтэһэллэр, кэлэр кэммитин билэллэр, бэрэбиэркэни табыгастаахтык ыыталлар, үчүгэй усулуобуйа тэриллэр. Биһиги сылааһы таптыыр дьон манна хаарга кэлэбит, оттон саха дьоно биһигини истиҥинэн сылыталлар», — диир Александр Антоновскай.
Бырааттыы Антоновскайдар ааспыт күрэхтэһиилэргэ икки бинтиэпкэнэн туһаммыттара, онон снайпер уонна корректировщик оруолларын уларытар кыахтаахтара. Боруонса мэтээл иһин ыытыллыбыт түһүмэххэ бинтиэпкэ Сергей Антоновскайга баара.
«Барыта кэрэ, чаҕылхай киирсиинэн түмүктэннэ, биһиги астынныбыт. Биһиги гражданскай ытааччылар буолабыт. Оттон байыаннайдар маастарыстыбаларын таһыма олус үрдүк. Урут да үчүгэй этилэр, билигин өссө үчүгэй. Бу турнир сылтан сыл кинилэр маастарыстыбаларын көтөҕөрө көстөр. Кэлэллэр, көрөллөр, кэпсэтэллэр, онтон бэйэлэрин мөлтөх өрүттэрин билинэллэр, ону эһиилигэр көннөстөллөр. Ханна эрэ кинилэртэн үөрэнэбит, кинилэр эмиэ биһигиттэн үөрэнэллэригэр эрэнэбин. Гражданскайдар уонна байыаннайдар икки ардыларыгар уопут атастаһыы буолар», — диэн бэлиэтээтэ Сергей Антоновскай.
Үһүс миэстэни бырааттыылар Россияҕа оҥоһуллан тахсыбыт Specter-LT1 бинтиэпкэнэн кыайдылар. Бинтиэпкэ Россия араас күрэхтэһиилэригэр көмөлөстө. Антоновскайдар бэйэлэрэ сааны ыраастыырга анаммыт туттар малы уонна саппаас чааһы оҥороллор. Кинилэр эппиттэринэн, бу дьыалаҕа практическай билиитэ суох, ырыынакка наадыйыыны эмиэ билэр уустук. Кинилэр хампаанньалара Россияҕа эрэ оҥоһуллар комплектарга болҕомто уурар.
Санатан эттэххэ, » Күн » түһүмэх кыайыылаахтарынан Саха Сириттэн Леонид Архангельскай уонна Михаил Ефимов буоллулар. Иккис миэстэни Үтүө уонна Үрүҥ позывнойдаах снайпердар ыллылар.
Күрэхтэһии РФ бырабыыталыстыбатын бэрэссэдээтэлин солбуйааччы – президент Уһук Илиҥҥэ боломуочуйалаах бэрэстэбиитэлэ Юрий Трутнев салайыытынан Аҕа дойду Улуу сэриитигэр Кыайыы 80 сылыгар ананан ыытылынна. Тэрээһин президент Уһук Илиҥҥэ боломуочуйалаах бэрэстэбиитэлин аппарата, Россия бойобуой снайпинг Федерацията, Саха сирин бырабыыталыстыбата, ону тэҥэ «БУОЙУН» киин өйөбүлүнэн тэрилиннэ.
