Бу сыл сэтинньи 9 күнүгэр РНА СС Гуманитарнай чинчийиилэрин уонна хотугу аҕыйах ахсааннаах норуоттар кыһалҕаларын института, итиэннэ Саха Өрөспүүбүлүкэтин национальнай библиотеката буолан, Саха сирин ономастическай чинчийиилэрин төрүттээччи Михаил Спиридонович Иванов – Багдарыын Сүлбэ төрөөбүтэ 95 сылыгар анаммыт тэрээһини ыыттылар.
Манна, кини тахсыбыт ыстатыйаларын, научнай үлэлэрин быыстапката, төгүрүк остуол уонна саҥа кинигэ сүрэхтэниитэ буолла. «Аат.Тыл.Этнос.» диэн төгүрүк остуол кыттыылаахтарын, ыҥырыылаахтарын институт дириэктэрэ Сардана Боякова, Саха салаатын сэбиэдиссэйэ Надежда Данилова уонна учуонай улахан уола Багдарыын Ньургун Сүлбэ эҕэрдэлээтилэр.
Төгүрүк остуолу институт дириэктэрин солбуйааччы Наталья Сивцева салайан ыытта. Тыл эппит институт Саха салаатыгар научнай үлэһитэ Федор Дьячковскай, Хотугулуу Илиҥҥи Федеральнай университет профессора, ф.н.д. Василий Илларионов, Институт историяҕа салаатын научнай улэһитэ, и.н.к. Пантелеймон Хардыы о.д.а. Багдарыын Сүлбэ олоҕун, үлэтин үрдүктүк сыаналаатылар.
Ол курдук, учуонай санааларын, наукаҕа үлэлэрин өрүү сахалыы тиэрдэрин, наука тылыгар саха тыла эмиэ баар буолуохтааҕын туһунан баҕа санаалааҕын бэлиэтээтилэр, учуонай ураты, сэдэх картотекатыгар ойуччу сыһыан ууруллуохтааҕын туһунан эттилэр. Бу тэрээһиҥҥэ куйаар ситиминэн РНА Монгол тылын, Будданы, Тибети үөрэтэр институттан, Тюмень, Бурятия, Санкт-Петербург судаарыстыбаннай университетыттан кыттыыны ыллылар.
Күн иккис аҥарыгар Любовь Иванова «Сүдү киһи Багдарыын Сүлбэ. Ыстатыйалар. Ахтыылар» диэн сана таһаарыы сүрэхтэниитэ буолла. Ааптар бэйэтэ билинэринэн, кини бу кинигэни суруйарыгар, Багдарыын Сүлбэ үлэлэрин кытары сана сиһилии билсиһэн иһэн ылынарга, сорук туруоруммут. Тэрээһин бэрт үрдүк таһымнаахтык, силигин ситэри толкуйданан ыытыллыбытын сылдьыбыт дьон астына бэлиэтээтилэр.
Борис Гоголев
