Бүгүн, от ыйын 25 күнүгэр, Ил Дархан Айсен Николаев “Бүлүү” федеральнай суол управлениетын начаалынньыгын Николай Андреевы кытта көрүстэ. Көрсүһүүгэ өрөспүүбүлүкэҕэ суол үлэтин хаамыытын туһунан кэпсэттилэр.
Николай Андреев иһитиннэрбитинэн, бүтэһик биэс сылга “Бүлүү” федеральнай суол управлениетын үлэһиттэрэ уопсайа 300 км тахса суолу саҥалыы уларытан оҥорбуттар уонна өрөмүөннээбиттэр.
Быйыл барыта 46 км тахса федеральнай суолталаах суол, 1 муоста уонна 35 ууну аһарар турбалар үлэҕэ киириэхтэрэ. Билигин «Бүлүү» суолун 8 учаастагар хапытаалынай өрөмүөн ыытыллар, ону таһынан «Халыма» суолун икки учаастага саҥалыы уларытан оҥоһуллар.
Айсен Николаев былааннаммыт эбийиэктэри хаачыстыбалаахтык тутарга уонна кэмигэр бүтэрэргэ сорудахтаата.
