Ыраах сытар уонна суола-ииһэ суох оройуоннары Россия атын регионнарын кытта тырааныспар сибээһинэн хааччыйыы бырабыыталыстыба биир сүрүн соруга буолар. 2025 сылга итинник маршруттарынан тиэйиини ыытар авиахампаанньалар ороскуоттарын толуйууга эбии 306,9 мөл.солк. тахса үп ыытыллыаҕа. Ол туһунан дьаһалга РФ бырабыыталыстыбатын бэрэссэдээтэлэ Михаил Мишустин илии баттаата.
Эбии үбүлээһин суотугар өссө 44 тыһыынчаттан итэҕэһэ суох киһини тиэйии көҥүллэниэҕэ. Урут бырабыыталыстыба итинник сыалга 1,4 млрд солк.тахса солкуобайы ыыппыта.
Ыраах уонна суола-ииһэ суох нэһилиэнньэлээх пууннартан чэпчэтиилээх авиарейстэринэн дьону таһыыга субсидия биэрии бырагыраамата 2018 сыллаахха үлэҕэ киирбитэ. Кини 82 маршруту хабан Москваҕа, Санкт-Петербурга, Сочига, Омскайга, Новосибирскайга, Екатеринбургка уонна Россия атын куораттарыгар көтүүлэри оҥорор.
Анал тарыыптаах билиэттэринэн туһаныыга, ол иһигэр 23 сааһыттан кыра, 55-тэн үөһэ саастаах дьахталлар, 60-тан тахса саастаах эр дьон, I группалаах инбэлииттэр, инбэлиит оҕолор, ону тэҥэ элбэх оҕолоох ыаллар бырааптаахтар.
