Н.Захаров-Сахаачча аатынан оҕо спортивнай оскуолатын тренердэрэ Саха сиригэр физкультурнай хамсааһын 100 сылынан, Саха сиригэр Педагог уонна Наставник сылынан уонна алтынньы 30 күнүгэр бэлиэтэнэр Тренер Бүтүн Россиятааҕы күнүгэр анаммыт тэрээһиҥҥэ муһуннулар.
Быйылгы тэрээһин тренердэр профессиональнай таһымнарын көрдөрөр өрөспүүбүлүкэтээҕи конкурс 2023 сыллааҕы кыайыылааҕа, Болугур филиалын волейболга тренерэ Василий Иванович Кузьмин маастар-кылааһыттан, аһаҕас дьарыгыттан саҕаланна. Методистар Вероника Николаева, Аина Петрова тренердэргэ методическай көмө оҥордулар.
Тренер күнүн бэлиэтээһин биир саамай истиҥ, иһирэх түгэнинэн араас кэмнэргэ үлэлээбит ветеран үлэһиттэри кытта көрсүһүү, ахтылҕан таһаарар кэпсэтии буолла. Амма спортивнай оскуолатыгар директорынан үлэлээбит Саха Өрөспүүбүлүкэтин физкультураҕа уонна спорка үтүөлээх үлэһитэ Михаил Васильевич Алексеев ахтыытын сэргии иһиттилэр уонна инникилээх этиитин олоххо киллэрэргэ үлэлэһиэх буолан эрэннэрдилэр. Спорду олохторун аргыһа оҥостубут, оҕо спорда сайдарыгар кылааттарын киллэрсибит ССРС спордун маастарыгар кандидат, РФ физкультураҕа уонна спорка туйгуна Лариса Пахомова, Саха Республикатын үтүөлээх тренердэрэ Александр Романов, Афанасий Владимиров, СӨ физкультураҕа уонна спорка туйгуна Марианна Нестерева, спорт ветерана Болугуртан Галина Максимова санааларын үллэһиннилэр.
Амма спордун сайдыытыгар туһуламмыт быыстапканы дириэктэри үөрэтэр үлэҕэ солбуйааччы Виктория Владимирова туруорда уонна «Үлэ аргыстаах эдэр саас» бырайыак чэрчитинэн аҕам саастаах коллегалартан үлэлээбит сылларын туһунан интервью ылан, видеоҕа устан үйэтитиигэ олук уурда, ветераннар үөрэ-көтө үлэлээбит-хамсаабыт саастарын, эдэр ыччакка баҕа санааларын тиэртилэр.
Бырааһынньыктааҕы тэрээһин үөрүүлээх чааһыгар дириэктэр Дмитрий Неустроев үлэлэригэр үрдүк ситиһиилээх тренердэргэ наҕараадалары уонна ветеран тренердэргэ, үлэһиттэргэ коллектив аатыттан бэлэхтэри туттартаата. Оттон эр дьон ансаамбыла Алтана Артемьева тылларыгар, Егор Неустроев – Тулуйхан матыыбыгар «Сахааччаҕа» ырыанан эҕэрдэлэрэ улахан биһирэбили ылла.
Истиҥ көрсүһүү кэнниттэн мустубут дьон Бүтүн Аан дойдуга чемпион, призер үрдүк аатын ылбыт мадьынылары чиэстиир өрөгөйдөөх түһүлгэҕэ киэн тутта кыттыстылар.
“Амма олоҕо” хаһыат
