Бэҕэһээ аан дойдуга Доруобуйа күнэ бэлиэтэммитэ. Орто дойдуга доруобуйа саҕа күндү уонна сыаналаах туох да суоҕа буолуо арааһа. Олох хорук тымырын хамсатар кини буоллаҕа. Кытыы сиргэ олорор тыа дьоно барахсаттар бырааска наадыйаллара ханна барыай? Суол-иис, кэлии-барыы өттүнэн ыарырҕатар нэһилиэк олохтоохторун миэстэтигэр кэлэн көрөллөрө-истэллэрэ, эмп-томп аныыллара, сүбэ-ама биэрэллэрэ — дьэ бу хайҕаллаах дьыала.
Алтантан кынат үүннэринэн тахсыбыт быраас кыргыттарбыт, бэйэбит оҕоолорбут, биир субуота күннэрин дойдуларын дьонугар анаан кэлэн көрөн, эмп анаталаан бардылар. Ол курдук, Дьокуускайдааҕы медициинэ киинин клинико-консультативнай салаатын ревматолог бырааһа Марина Гаврильевна Неустроева, Дьокуускай 3 нүөмэрдээх поликлиникатын кардиолог бырааһа Нарыйа Сергеевна Васильева, Хаҥалас улууһун киин балыыһатын лор бырааһа Матрена Ильинична Иванова сарсыардаттан киэһээҥҥэ диэри Алтаннааҕы амбулаторияҕа үлэлээтилэр. Кэлиэхтэрин иннинэ, үлэһэн 106 киһи суруйтарбыттарын таһынан баҕалаах дьон бары кэлэн көрдөрүнэн, сүбэ-ама ылан тарҕастылар.
«Хас биирдии киһини олус болҕомтолоохтук, кыһамньыларын ууран туран көрбүттэрин олус астынным, билэллэрин-көрөллөрүн сөхтүм уонна киэн тутуннум, дойдуларын туһугар кыһаллан кэлэн өрөбүллэрин аахсыбакка буор босхо дьону көрөн уһун күнү быһа үлэлээбиттэригэр ис-сүрэхпититтэн махтанабыт. Маннык дьиҥнээх патриот ыччаттардаахпытыттан киһи эрэ санаата көтөҕүллэр, эрэх-турар сананабыт, инникигэ эрэллээх буолабыт. Өссө даҕаны маннык үтүө санаанан салайтаран үлэлээҥ-хамсааҥ, дьон-сэргэ махталын ыла туруҥ, уустук үлэҕитигэр ситиһии-табыллыы, тус олоххутугар дьол-соргу тосхойдун!», — диэн нэһилиэк олохтооҕо Анисия Петрова махталын уонна баҕа санаатын тириэрдэр.
Маныаха ис хоһоонноох махтал тыллара нэһилиэк дьонуттан-сэргэтиттэн элбэхтэ иһилиннэ. Бу үтүө тыллар, баҕа санаалар кыргыттарбытын кынаттаан уустук үлэлэригэр тирэх буоллуннар. Куруук күлэ-үөрэ сылдьыҥ, айылҕа киэҥ ыллыгынан эрэллээхтик хааман иһиҥ диэн үрүҥ халааттаах аанньалларбытыгар — оҕолорбутугар ыраас салгынынан төрөөбүт дойдугутуттан алгыспытын ыытабыт. Туһунан махтал тыллара кыргыттары Дьокуускайтан буор-босхо аҕалбыт үтүө санаалаах суоппарга Петр Никифоровка ананаллар. Үтүө санааҕыт уон оччонон, үтүөнэн, сырдыгынан эһиэхэ бэйэҕитигэр төннөн кэллин.
Татьяна АТЛАСОВА, Амма олоҕо хаһыат
