26 От ыйа 26.07
  • 19°
  • $ 85,41
  • 93,17

Александр Жирков Хаҥаласка саха саарына Илья Шадрин төрөөбүтэ 260 сылыгар аналлаах тэрээһин мунньахха кытынна

17:35, 25 мая 2018
Текст:
Читайте нас на
Яндекс Новости
ЯДВ

Ыам ыйын 23 күнүгэр Саха Өрөспүүбүлүкэтин Ил Түмэнин Бэрэссэдээтэлэ Александр Жирков Хаҥаласка Илья Максимович Шадрин төрөөбүтэ 260 сылыгар аналлаах тэрээһин мунньахха кытынна. Мунньахха Ил Түмэн Бэрэссэдээтэлин бастакы солбуйааччы Анатолий Добрянцев, Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, норуот депутата Дмитрий Семенов, Хаҥалас улууһун баһылыга Гаврил Алексеев, Дьокуускайдааҕы Спасскай эр дьон манастыырын наместнига Никон Игумен, улуус администрациятын дьаһалтата, архыып, музей үлэһиттэрэ аймахтара кытыннылар.

2018 сылга өрөспүүбүлүкэ бөдөҥ общественнай, политическай деятель Илья Максимович Шадрин төрөөбүтэ 260 сылын бэлиэтиэҕэ.

Кини 1758 сыллаахха Малдьаҕар нэһилиэгэр элбэх оҕолоох дьиэ кэргэҥҥэ төрөөбүтэ. Бэйэтин кэмигэр бары өттүнэн сайдыылааҕа, нуучча тылын билэрэ. Хаҥалас улууһун 5 Малдьаҕар нэһилиэгэр старосталаабыта. Саха сиригэр бэйэни салайыныыга хамсааһыны таһаарбыт бөдөҥ общественнай деятель. XVIII үйэ бүтүүтэ — XIX үйэ саҕаланыыта Илья Шадрин олохтоох бэйэни салайыныыга көрдөһүүлэри бэлэмнээн, хаста даҕаны Санкт-Петербург куоракка бара сылдьыбыта. Онно Россия империятын ыраахтааҕыларын Екатерина II, Павел I, Александр I кытта тус көрсөн кэпсэппитэ. Кэлин (1800, 1812 с.) олохтоох нэһилиэнньэҕэ Иркутскай уонна Охотскай айан суолунан почта үлэтигэр икки өттүттэн сөптөөх усулуобуйаҕа чэпчэтиилэри киллэртэрбиттэрэ.

Илья Шадрин өссө Саха сиригэр православнай итэҕэл тарҕаныытыгар сүҥкэн суолталаах үлэни ыыппыта. 1814-1822 сыллардаахха Сиинэҕэ Воскресенскай таҥара дьиэтин үбүлээн туттарбыта. Инники сайдыыны өтө көрөр киһи ыччат үөрэхтээх, сайдыылаах буоларыгар кыһанара. Кинилэри Россия империятын тарбахха баттанар үөрэхтэрин кыһаларыгар киллэртээбитэ. 1800 сыллаахха Илья Максимович туруулаһыытынан император Павел I Дьокуускай куоракка духуобунай оскуола аһылларын туһунан Ыйааҕа тахсыбыта.

Кини таһаарыылаах үлэтин сыаналааннар императордар наҕараадаларынан бэлиэтээбиттэрэ. 1788 сыллаахха халлаан күөх лиэнтэлээх үрүҥ көмүс мэтээлинэн, 1799 сыллаахха Аннинскай лиэнтэлээх кыһыл көмүс мэтээлинэн уонна 1802 сыллаахха анал үрүҥ көмүс саабыланан наҕараадаламмыта. Илья Максимович Шадрин 1826 сыллаахха өлбүтэ.

Ил Түмэн Бэрэссэдээтэлэ Александр Жирков саха саарына Илья Шадрин бэйэтин кэмигэр Саха сирин сайдыытын туһугар турууласпытын, ол туһунан киэҥ эйгэҕэ сырдатыы тахса илигин аҕынна. Быйылгы үбүлүөйдээх сылыгар дьоҥҥо-сэргэҕэ толору арыйан кэпсээн, сырдатан, үйэтитэр дьаһаллары дьоһуннаахтык ыытарга бэлэмнэниэхтээхпит диэн бэлиэтээтэ.

Илья Шадрин төрөөбүтэ 260 сылын тэрийэр өрөспүүбүлүкэтээҕи хамыыһыйа бэрэссэдээтэлэ, Ил Түмэн Бэрэссэдээтэлин бастакы солбуйааччы Анатолий Добрянцев Ил Түмэн Бэрэссэдээтэлэ Александр Жирков дьаһалынан 2017 сыл тохсунньу 18 күнүгэр бөдөҥ общественнай, политическай деятели сырдатар сыаллаах хамыыһыйа тэриллибитин, бэлэмнэнии үлэ туһунан сырдатта.

Алтынньы ыйга Илья Максимович олоҕун, үлэтин сырдатар научнай-практическай конференция ыытыллыаҕа. Санкт Петербурдааҕы историческай, Дьокуускайдааҕы

национальнай архыыптартан, Гуманитарнай институттан хомуллубут матырыйааллардаах кинигэ бэлэмнэнэр.

Бөдөҥ общественнай, политическай деятель туһунан теле-радио биэриилэр, хаһыаттарга ыстатыйалар суруллаллар. Үбүлүөйүнэй сыл чэрчитинэн Покровскайга бюст туруоруллуоҕа, Сиинэҕэ Воскресенскай таҥара дьиэтэ тутуллан аны күһүн аһыллыаҕа.

Дьокуускай куоракка сэтинньи ыйга общественность кыттыылаах үөрүүлээх мунньах, үбүлүөйүнэй тэрээһин, ыытыллыаҕа.

Мунньах түмүгэр спикер Александр Жирков бөдөҥ общественнай, политическай деятель Илья Максимович Шадрин төрөөбүтэ 260 сылын көрсө үлэ бара турарын, өрөспүүбүлүкэ салалтата, парламена Саха сирин туһугар турууласпыт ытык дьоммутун сырдатары өйүүрүн, үйэтитии барыахтааҕын бэлиэтээтэ, хаалбыт кэмҥэ өссө тэтимнээх үлэни баҕарда.

Ил Түмэн пресс-сулууспата

Следите за самым важным и интересным в Telegram-канале и WhatsApp-группе ЯСИА