Айсен Николаев бэҕэһээ “быһа линия” кэмигэр Арассыыйа бэрэсидьиэнэ Владимир Путиҥҥа 2018 сыл иккис кыбартаалыгар хамнас аччаабытын туһунан ыйытыы биэрбит Дьокуускайдааҕы үп-экономическай коллеһын преподавателэ Михаил Вагановы кытта көрүстэ. Өрөспүүбүлүкэ Ил Дарханын э.т. хамнаска өйдөспөт буолуу буҕалтыарыйа быһаарбатаҕыттан тахсыбыт, диэтэ.
Санатан эттэххэ, бэҕэһээ “быһа линия” кэмигэр Дьокуускайдааҕы үп-экономическай коллеһын преподавателэ Михаил Ваганов 2018 сыл саҥатыгар хамнас үрдээн баран, кэнники тоҕо түспүтүн ыйыппыта.
Өрөспүүбүлүкэ Ил Дарханын э.т. Айсен Николаев Арассыыйа бэрэсидьиэнигэр хамнас аччааһына тахсыа суоҕа диэн эрэннэрбитэ. “Быһа линия” кэнниттэн тута кини Саха сирин бырабыыталыстыбатын бэрэссэдээтэлин солбуйааччы Алексей Дьячковскайы уонна регион үөрэххэ уонна наукаҕа миниистирин Владимир Егоровы кытта көрсүбүтэ уонна колледжка үөскээбит балаһыанньаны быһаарсыбыта.
Иһитиннэрии бигэргэммитэ: 2018 сыл бастакы кыбартаалыгар ЯФЭК-ка бириэмийэлэр уонна көҕүлүүр төлөбүрдэр ый аайы төлөммүттэрэ, тоҕо диэтэххэ, ахсынньы ый бүтүүтэ кэлэктиибинэй дуогабарга илии баттаммыта, иккис кыбартаалтан төлөбүрдэри кыбартаалынан төлүүр буолбуттара. Ол иһин хамнас муус устар-ыам ыйдарыгар эмискэ түспүтэ”, — диэн быһаарда Николаев.
Кини этэринэн, бу балаһыанньаҕа буҕаалтырдар бөрүкүтэ суох быһыыны таһаарбыттар – дьоҥҥо төлөбүрдэр ньымаларын быһаарбатахтар.
“Бастакы кыбартаалга ыам ыйдааҕы ыйаахтары педагогтарга уонна производственнай үөрэтии маастардарыгар 109 бырыһыан толоробут. Иккискэ бу таһымы тутуохпут”, — диэн эбэн эттэ өрөспүүбүлүкэ үөрэҕин уонна наукатын миниистирэ Владимир Егоров.
Билигин Ил Дархан э.т. Айсен Николаев маннык эттэ: “Михаил Сергеевич бу боппуруоһу туруорбута сөптөөх, тоҕо диэтэххэ, кини ыйытыытын кэннэ социальнай тиһигинэн миэхэ маннык кыһалҕалаах үгүс киһи суруйда. Маннык боппуруостары харахпыт далыттан таһаарыа суохтаахпыт”.
Санаайа Иванова,
Мария Васильева хаартыската.
