22 От ыйа 22.07
  • 23°
  • $ 88,02
  • 96,04

Айсен Николаев Маҕараска бааһынай хаһаайыстыбаҕа сырытта

18:20, 31 июля 2018
Текст:
Читайте нас на
Яндекс Новости
ЯДВ

«Горнай ас» ТХПК былырыын «Маай» ТХПК оннугар ахсынньыга тэриллибитэ. Билигин хаһаайыстыба саҥа арыы сыахтарын тутарын сэргэ, улахан хотону сөргүтэн эрэр. Ил Дархан э.т. Айсен Николаев бүгүн Горнай улууһугар сырыытын бу хаһаайыстыбаттан саҕалаата.

Хаһаайыстыба бэрэссэдээтэлэ Сергей Семенов бэлиэтииринэн, билигин Маҕараскауонна Бэрдьигэстээххэ саҥа арыы сыаҕын тута сылдьаллар. «Саҥа таас арыы сыаҕа диэн улууска суох этэ. Бука, өрөспүүбүлүкэҕэ да суох буолуохтаах. Мин санаабар, уруккулуу олордохпутуна биһиги хаһан да сайдыбаппыт. Онон бу тутууну  былааннаабыппыт. Быйыл төрдүс кыбаарталга үлэҕэ киллэриэхтээхпит.  Таас тутуу үйэлээх буолан, маннык барыйааҥҥа тохтообуппут. Билигин 3500 тонна үүт былааннаахпытыттан, аһары толорон олоробут», — диэн бэлиэтиир кини.


Билигин бааһынай хаһаайыстыба уонтан тахса көрүҥ үүт аһы астыыр. Оҥорон таһаарбыт бородууксуйатын 40-60% Дьокуускай куоракка батарар. Онтон хаалбытын улуус иһигэр атыылыыр.
Аһымаҕа үүт тутар сирдээх. Онон улуус нэһилиэктэриттэн барыларыттан үүт тутар. Билиҥҥи туругунан, улуус үрдүнэн күҥҥэ 15 тонна үүтү тутар.
Үүт туттарааччылар харчыларын тута ылан иһэр буолан, манна кыһалҕа суох. «Үүт туттарааччыларга харчыларын карточкаҕа ыыта олоробут. Барыларыгар карточка арыйбыппыт», — диэн кэпсиир Сергей Семенов.
Оттон хотоннорун туһунан эттэххэ, 2012 сыллааҕы тутууну сөргүтэн, билигин саҥалыы бырайыактаан олороллор. Билигин «АгроГорнай» ТХПК 280 төбө ынах сүөһүлээх. «Хотон икки түһүмэҕинэн тутуллуохтаах. Бастакы уочарата киирбитэ. Ол эрээри үбүлээһинэ кыайтарбакка, салгыы тутуллубатаҕа. 400 төбөҕө диэн анаммыта. Былаан быһыытынан, хотон үрдүгэр теплица тутуллуохтаах. Хотон сылааһа барыта үөһэ тахсар. Ону барытын биһиги туһаныахтаахпыт. Бу комплекс иккиһинэн оскуола оҕолорун үөрэтиигэ төһүү күүс буолуохтаах«, — диэн бэлиэтиир Сергей Семенов.

Аграфена КУЗЬМИНА, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА