15 От ыйа 15.07
  • 20°
  • $ 87,74
  • 95,76

Айсен Николаев бастакы оробуочай сырыытын Халыма эҥээр улуустарга оҥордо

17:41, 05 июня 2018
Текст:
Читайте нас на
Яндекс Новости
ЯДВ

Ил Дархан эбээһинэһин быстах кэмҥэ толорооччунан ананаат таһаарбыт бастакы ыйааҕар Айсен Николаев болҕомтону халаан содулун туоратыы, чөлүгэр түһэрэр үлэлэри тэрийии тирээн турар дьаһалларыгар уурбута.

edersaas.ru.

Айсен Сергеевич улуустарга бастакы сырыыта эмиэ халааны кытары ситимнэннэ. Ол курдук, бүгүн уонна сарсын Халыма эҥээр улуустарга уонна Усуйаанаҕа сылдьан улуустар дьаһалталарын, суһал ыстаап үлэһиттэрин кытары көрсөр. Халааҥҥа ылларбыт нэһилиэктэргэ балаһыанньа хайдаҕын, көмө хайдах тэриллэрин билсэр. Санатан эттэххэ, Халыма уонна Дьааҥы өрүстэр таһымнааннар, халаан уутуттан Үөһээ Халыма, Орто Халыма, Аллараа Халыма уонна Усуйаана улуустарыгар сэттэ нэһилиэнньэлээх пуун эмсэҕэлээтэ.

Бүгүн бастакы суһал мунньах Үөһээ Халымаҕа ыытылынна. Бу улууска халаан икки нэһилиэнньэлээх пууну: Зырянканы уонна Үөһээ Халыма сэлиэнньэтин ылбыт. Зырянкаҕа уу 101 тиэргэни, 657 киһи олорор 61 элбэх кыбартыыралаах, уон биэс чааһынай дьиэтигэр киирбит, 13 км усталаах суолу алдьаппыт. Улуус баһылыгын э.т. Леонид Лысенко этэринэн, билигин уу түһэн эрэр, хоромньуну ааҕыы үлэтэ саҕаламмыт.

Бырабыыталыстыба бэрэссэдээтэлин бастакы солбуйааччы Алексей Колодезников өрөспүүбүлүкэҕэ ыксаллаах быһыы-майгы федеральнай таһымынан ыам ыйын 14 күнүгэр биллэриллибит буолан, хоромньуну толуйууга докумуоннары туттарыы кэмэ олус ыгымын бэлиэтээтэ. Оттон улуус дьаһалтата ууга барбыт дьиэлэр сорохторо саахалланар туруктаахтара уустуктары үөскэтэрин эттэ.

Айсен Николаев быйылгы сылга саҥа дьиэлэри тута охсор кыаллыбатын санатта уонна ол дьиэлэри кыстыгы көрсө сөргүтэргэ итиэннэ кэлэр 2019 сылтан тутууга күүскэ ылсар соругу туруорда. Онуоха олорор дьиэ-уот сертификатын ылар кыахтаах дьоҥҥо төһө кыалларынан көмөлөһөргө, чөлүгэр түһэрэр үлэни түргэн тэтиминэн ыытарга тутуу матырыйаалларын суһаллык тиэрдэргэ, устудьуоннар тутар этэрээттэрин социальнай эбийиэктэргэ эрэ буолбакка, чааһынай дьиэлэри сөргүтэргэ эмиэ туһанарга күүскэ үлэлииргэ сорудахтаата.

— Халаантан эмсэҕэлээбиттэргэ көмө оҥоһуллуо диэн дьоҥҥо-сэргэҕэ тиэрдиҥ, биһиги кими да соҕотохтуу хаалларыахпыт суоҕа, — диэтэ.

Ил Дархан эбээһинэһин быстах кэмҥэ толорооччу күнүстэн киэһэ Орто Халымаҕа үлэлээтэ.

Раиса Сибирякова, Саха сирэ» edersaas.ru.

Хаартыскаҕа Галина Мозалевская түһэриитэ

Сыыппара

14 улууска 53 нэһилиэнньэлээх пуун халааҥҥа ылларбыт

46 нэһилиэнньэлээх пууҥҥа 1314 олорор дьиэҕэ уу киирбит

4 тыһ. 711 киһи олорор дьиэтэ-уота эмсэҕэлээбит

3 тыһ. 567 киһи хоромньуну толуйууга докумуон түһэрбит.

0

0
Следите за самым важным и интересным в Telegram-канале и WhatsApp-группе ЯСИА