2022 сылга Саха сиригэр оскуолалары, оҕо саадтарын, балыыһалары, култуура дьиэлэрин, спортивнай комплекстары тутууга, хаарбах дьиэлэри көһөрүүгэ 42 млрд солк. тахса сууманы ыытыахтара.
Айсен Николаев: Биһиги Арассыыйа үрдүнэн бастакынан инфраструктурнай бүддьүөккэ кредит сайаапкатын көмүскээтибит. Чэпчэки уонна уһун болдьохтоох үп суотугар мөлүйүөн аҥаара кв. миэтэрэ иэннээх олорор дьиэлэри тутууга инфраструктура бэлэмнэниэҕэ. 15 тыһыынчаттан тахса киһи түргэнник үүнэр саҥа кыбаарталларга – Дьокуускай уонна Нерюнгри куораттарыгар олохсуйуон сөп. Бу кыбаарталларга дьон-сэргэ тупсаҕайдык олороругар, оҕону иитэригэр барыта баар буолуоҕа. 13 социальнай объект тутуллара былааннанар, ол иһигэр 2 поликлиника, үс оскуола, үс оҕо саада уонна спортивнай саалалаах хоккейдыыр сир.
