Айсен Николаев анал этиитигэр 2022 сылы Саха сиригэр ийэ сылынан биллэрдэ. Өрөспүүбүлүкэ аҕа баһылыга бу быһаарыыны ийэ буолуу социальнай статуһун үрдэтэр сыаллаах ылыммыттарын быһаарда, диэн СИА иһитиннэрэр.
«Хас биирдии киһи ийэттэн төрүүр. Уопсастыба инники дьылҕата ийэ оҕотун хайдах иитэн-үөрэтэн таһаарарыттан тутулуктаах. Ийэлэр оҕолорун тапталга уонна кыһамньыга ииттэхтэринэ, оҕо дойдутугар итэҕэллээх инникитигэр эрэллээх буолар. Онон ийэ суолтатын үрдэтэр, тустаах болҕомтону уурар сыалтан 2022 сылы ийэ сылынан биллэрдим«, — диэн Айсен Николаев чопчулаата.
Ил Дархан өрөспүүбүлүкэҕэ ийэ буолуу социальнай статуһун үрдэтиигэ кэккэ дьаһаллар ыытыллалларын бэлиэтээтэ. Олор олоххо киирэллэригэр ситэриилээх былаас уорганнара уонна парламент үлэлэһиэҕэ.
«Мин бүгүн бырабыыталыстыба уонна Ил Түмэн иннигэр 2022 сылга ыытыллыахтаах тэрээһиннэри ааттаатым. Ийэлэргэ, элбэх уонна иитиэх оҕолоохторго көмө төлөбүрдэрин үрдэтэллэриттэн саҕалаан, социальнай суолталаах объектар тутууларынан түмүктээн кэккэ дьаһаллары сорудахтаатым. Бу өйөбүл миэрэлэр холбоон, ийэ суолтата үрдүүрүгэр көмөлһүөхтэрэ«, — диэн эбэн эттэ.
Нэһилиэнньэ үүнүүтүнэн Саха сирэ Уһук Илин региоҥҥа бастаан иһэр. Чуолаан, оҕо төрөөһүнүн коэффициена дойду үрдүнэн 6- с миэстэни ылар, диэн Айсен Николаев бэлиэтээтэ.
«Бу тенденцияны өйүөххэ уонна оҕо төрөөһүнэ өссө элбиирин туһугар бары усулуобуйаны оҥоруохха», — диэн түмүктээтэ.
Маны кытта эһиил Саха АССР төрүттэммитэ 100 сылынан, бу сылга Саха сиригэр төрөөбүт хас биирдии оҕоҕо «Дети столетия» сыаллаах капитал оҥоһуллан, 100-түү тыһыынча солкуобай көрүллэрин туһунан эттэ.
Ону тэҥэ, муниципальнай тэрилтэлэри биэстэн элбэх оҕолоох ыаллары нолуоктан толору босхолуурга этии киллэрдэ.
Айсен Николаев бырабыыталыстыба уонна өрөспүүбүлүкэ парламенын иннигэр 5 сыл устата биэс уонна биэстэн элбэх оҕолоох ыалга дьиэ-уот боппуруоһун быһаарарга эбии өйөбүл миэрэлэрин толкуйдуулларын соруйда. Оҕону иитэ ылар дьиэ кэргэттэргэ хамнастарын 2 төгүл улаатыннарарга сорудахтаата.
