НВК САХА — Балаҕан ыйын 8 күнүгэр ыытыллыбыт муниципальнай таһымнаах быыбарга куоластааччы 28,8 %-на кыттыыны ылла.
Саха сиригэр 57 быыбар хампаанньата өрөспүүбүлүкэ 25 улууһугар уонна Жатай бөһүөлэгэр ыытылынна.
Бастакы ааҕыы түмүгүнэн, Аллайыаха улууһун баһылыгар кандидат Яков Елисеев быыбардааччы 59,4 % куолаһын ылан кыайан иһэр.
Алараа Халыма улууһун баһылыгар — Валерий Синтяков 59,4% куолаһы ылан бастаата.
Өлүөхүмэ улууһун олохтоохторун элбэх куолаһын Николай Харбин ылла — 45,45%.
Жатай бөһүөлэгэр Евгения Исаева кыайда.
Саха сиригэр уопсайа 123 муниципальнай тэриллии депутатын уонна 22 баһылыгы таллылар.
Быыбар хампаанньатыгар уопсайа 6 баартыйа кытынна. Уопсай талыллааччылартан биир гыммыттан үһэ бэйэтэ туруоруммут дьон.
Куоластааһын уонна түмүк ааҕыы кэмигэр быыбардыыр учаастактарга 300-тэн тахса кэтээн көрөөччү уонна 130-тэн тахса сүбэ таһаарар бырааптаах куоластаах хамыыһыйа чилиэнэ сырытта.
Быйылгы муниципальнай таһымнаах быыбарга маҥнайгытын өрөспүүбүлүкэ уопсастыбаннай палаататыттан манааччылар үлэлээтилэр.