Бу туһунан Тырааныспар министиэристибэтин пресс-сулууспата иһитиннэрэр. Бу быстах кэминээҕи гидротехническай тутууну оҥоруу – өрүс уутун уустук усулуобуйатыгар «кураанах сири» тэрийэргэ наадалаах суолталаах түһүмэҕинэн буолар. Коффердам 284,5 миэтэрэ үрдүктээх күргэ сүрүн пилонун акылаатын быһаччы Өлүөнэ сүнньүгэр тутар кыаҕы хааччыйыаҕа. Чугастааҕы кэмҥэ тутааччылар көмүскэллээх иэн иһигэр далааһыннаах үлэлэри ыытыахтара – 40 миэтэрэттэн дириҥҥэ 208 буурданан түһэриллэр сыбаайалартан турар акылааты оҥоруу, ростверканы тэрийии, уу таһымыттан үрдүк бэлиэтигэр таһаарыы күүтэр. Бу үлэлэр түмүктэммиттэрин уонна муус барбытын кэннэ Табаҕа тумулун өттүттэн тутууну кэтээн көрөр Саха сирин олохтоохторо күргэни тутуу саамай кэрэхсэбиллээх түһүмэҕинэн – пилоннар үөһэ тахсыыларын саҕаланыытын көрүөхтэрэ.
Өлүөнэ күргэтэ – Арассыыйаҕа саамай улахан инфраструктурнай бырайыактартан биирдэстэрэ. Бырайыак «ВИС» бөлөх Саха Өрөспүүбүлүкэтин Бырабыыталыстыбатын кытта сөбүлэһиитинэн концессия ньыматынан олоххо киирэр. Арассыыйа Бэрэсидьиэнэ Владимир Путин өйөбүлүнэн уонна дойду Бырабыыталыстыбатын быһаарыыларынан «Олоххо аналлаах инфраструктура» национальнай бырайыакка киллэриллибитэ.
