Муус устар 1 күнүттэн «Азия оҕолоругар» аккредитацияланыы саҕаланна. Барыта 18 тыһыынча кэриҥэ киһи ааһара былааннанар.
Ол туһунан спорт миниистирин солбуйааччыта Гаврил Мохначевскай иһитиннэрдэ.
Оонньуулар эбийиэктэригэр киирии аккредитацияны ааспытын туоһулуур бейджтаах уонна тырааныспар пропусктаах эрэ буоллаҕына көҥүл. Маннык миэрэлэр куттал суох буолуутун кытта сибээстээх.
Аккредитацияны, бастатан туран, волонтердар, тэрийэр кэмитиэт уонна эбийиэктэргэ хааччыйар араас эбээһинэстээх дьон ылаллар. Кинилэри сэргэ спортивнай делегациялар, СМИ бэрэстэбиитэллэрэ уонна ыҥырыылаах ыалдьыттар.
Бейджтары уонна пропускатары тэрилтэлэргэ бэс ыйын 10 күнүттэн биэртэлээн барыахтара, оонньуулар сүрүн информационнай кииннэригэр, ол эбэтэр Дьокуускай куорат № 31-дээх оскуола баазатыгар.
