Сунтаар Күүкэйигэр күөл уутун хаайан ходуһалары нүөлсүтэргэ шлюз-регулятор туттулар. Билигин эбийиэги федеральнай бырагыраамаҕа киллэрэргэ үлэ барар. Оччотугар 18 мөл. солк. федеральнай бүддьүөттэн төннүөхтээх. 


Күүкэйгэ шлюз-регулятор тутуута бу сыл атырдьах ыйын 8 күнүттэн саҕаламмыта. Баараҕай тутууга «Күүкэй» хаһаайыстыба 20 мөл. солк. көрбүтэ. Бырайыагын үлэтигэр «Гидропроект» ХЭТ, бэдэрээтчигинэн Сунтаар улууһун биир улахан тэрилтэтэ «Айан Суол» ХЭТ үлэлээтилэр.

Алтынньы 9 күнүгэр күүкэйдэр 18 сыл күүппүт, туруорсубут шлюз-регулятордарын аалай лиэнтэтин быстылар. Үтүө миссияны Сунтаар улууһун баһылыга Анатолий Григорьев, Күүкэй нэһилиэгин баһылыгын солбуйааччы Валентина Романова, СӨ тыатын хаһаайыстыбатыттан бэрэстэбиитэл, сир-уот департаменын кылаабынай исписсэлииһэ Егор Андреев, «Күүкэй» хаһаайыстыба салайааччыта Данил Федоров, «Айан-Суол» ХЭТ дириэктэрин солбуйааччы Михаил Евсеев толордулар.

«Күүкэй» тэриллиилээх хаһаайыстыбатын салайааччыта Данил Федоров,  тутуу бэдэрээтчигэ «Айан Суол» ХЭТ, шлюз-регулятор үлэҕэ киирэригэр элбэхтэ сүүрбүт-көппүт, туруорсубут Күүкэй нэһилиэгин баһылыга Федор Федоров махтал суруктары туттулар.

Маннык баараҕай тутуу, шлюз-регулятор Сэбиэскэй сойуус ыһыллыбытын кэннэ Сунтаар улууһугар бастакы буолан улахан суолталаах, тыа хаһаайыстыбатын инники сайдыытыгар төһүү күүс буолуоҕа.

Ааптар: Станислав Ноговицын

0
0
comments powered by HyperComments