Идэҕэ урутаан үөрэтии киинэ (Центр опережающей профессиональной подготовки) бастакы сити-пиэрмэрдэри үөрэтэн таһаарда. Идэҕэ уһуйууга тыа хаһаайыстыбатын техникума көмөлөстө.
Сити-пиэрмэр идэтигэр агрооскуола бэрэстэбиитэллэрэ, саҥа саҕалыыр пиэрмэрдэр, оҕуруот аһын үүннэриитинэн дьарыктанар дьон уһуйулуннулар.
Курсааннар аэро- уонна гидропоннай установкаларга үүнээйи олордорго, агрокултуураны үүннэрэргэ иҥэмтэлээх эйгэни, табыгастаах микрокилиимэти тэрийэргэ, куорат, тыа сиригэр туттуллар мобильнай гидропоннай установкалары оҥорорго үөрэннилэр.
Бүлүү улууһуттан сылдьар Иван Сивцев гидропоника ньыматынан үүнээйи үүннэриитинэн интэриэһиргиир. «Үөрэх кэмигэр гидропоннай установка оҥорорго үөрэнним. Икки үс миэтэрэлээх ПВХ турбата эрэ наада. Онтубун былырыын туттубут сылаас тэпилииссэбэр туруордум. Билигин клубника рассадатын ылан, үүннэрэн көрөрүм хаалла», — диир Иван Сивцев.
Айталина Томская дьэдьэн үүннэриитинэн дьарыктанар крестьянскай-фермерскай хаһаайыстыба баһылыга: «Үөрэххэ ылбыт билиибитин номнуо үлэбитигэр туттан эрэбит — мобильнай гидропоннай установкабытын туруордубут. Ийэ дьэдьэммитин олордон көрүөхпүт. Үүнээйи агротехникатыгар билиим үлэбэр туһалыа диэн эрэнэбин. Миэхэ агронома суох киһиэхэ ити билиим олус туһалах буолла».
Үөрэх дистанционно истэччиилэргэ табыгастаах бириэмэҕэ барар. Үөрэнээччилэр тыа хаһаайыстыбатын техникумугар итиэннэ «Саюри» тэпилииссэҕэ уһуллубут видеолиэксийэлэри көрөллөр. Үөрэх бүтүүтэ ВКС нөҥүө түмүктүүр үлэлэрин туттараллар. Үөрэхтэрин түмүгүнэн квалификацияларын үрдэппиттэрин туоһулуур дастабырыанньа туталлар.
Билигин Киин үһүс бөлөххө истээччилэри хомуйар. Сиһилии http://copp14.ru/dlyav саайтка «Услуги – для всех» баска билсиэххэ, кууруска сурутуохха сөп.
