Нерюнгри оройуонун Хани бөһүөлэгин үөрэнээччитэ Дарья Клементенок SKIF каратэҕа аан дойду чемпионатыгар үрүҥ көмүс уонна боруонса мэтээллэри аҕалла. 47 араас дойдуттан тыһыынча кэриҥэ спортсмен Джакарта (Индонезия) куоракка атырдьах ыйын 26-28 күннэригэр муһуннулар.
Россия сүүмэрдэммит хамаандатын састаабыгар Владимир Клементенок уонна кини кыыһа Дарья киирбиттэрэ.
Эдэр спортсмен «ката» көрүҥҥэ кытынна уонна аҕыс утарсааччытын кыайталаан үрүҥ көмүс мэтээли ылла. Кыһыл көмүс мэтээл иһин күөн көрсүүгэ Япония спортсменыгар хоттордо. Ону таһынан «кумитэ» салааҕа боруонса мэтээлгэ тигистэ.
«Дарья төрдүс миэстэни ылыа дии санаабыппыт. Онон үрүҥ көмүс мэтээллэммитигэр үөрүүбүт муҥура суох улахан. Сарсыныгар «кумитэ» күөн көрсүүгэ олус күүстээх утарсааччылардааҕа. Ол да буоллар Саха сирин спортсмена боруонса мэтээлгэ тигистэ», — диэн Россия сүүмэрдэммит хамаандатын хапытаана Константин Якутин этэр.
Биһиги хамаандабыт уопсайа кыһыл көмүс 1, үрүҥ көмүс 2 уонна боруонса 3 мэтээллэри ылла.
