НВК САХА – “Саха сирин киэн туттуута” диэн норуот бириэмийэтин “Медицина үлэһитэ” анал аат кыайыылааҕа билиннэ. Ол курдук 13 тыһыынчаттан тахса куолаһы ылан, Дьокуускай куорат 3 №-дээх балыыһатын эндоскопия салаатын сэбиэдиссэйэРоман Васильев бастыҥынан ааттанна.
Бу курдук эндоскопист быраас Роман Васильев хас биирдии ыарыһаҕы кытта иҥэн-тоҥон кэпсэтэн, ыарыы туохтан төрүөттэмитин сиһилии быһаарар. Оттон кини идэтигэр олоҕун 35 сылын анаабыт үтүөлээх быраас.
Билигин ас-үөл хаачыстыбата соччото суох буолан, дьон иһэ-үөһэ ыалдьара үгүс. Кэлин дьону көрөр аппарат тупсан, быраастар ыарыыны эрдэттэн сэрэтэр буоллулар, ол иһин урукку дьыллардааҕар ыарыһах ахсаана балачча аҕыйаата.
“Роман Романович үрдүк таһымнаах исписэлиис, дьон-сэргэ, коллегалара, доҕотторо олус ытыктыыллар. Куруук биһигини, эдэр исписэлиистэри, өйүүр, сүбэлиир-амалыыр”, – диэтэ чөлүгэр түһэрэр салаа кардиолог бырааһа Лилия Мохначевская.
Үтүөнү оҥорбутун уон оччонон эргиллэр диэн этии Роман Романович “Саха сирин киэн туттуута” диэн норуот бириэмэйитигэр кыттарыгар төһүү күүс буолла. “Медицина үлэһитэ” диэн аакка 13 тыһыынчаттан тахса куолаһы ылан, бастыҥынан ааттанна.
“Чахчы улахан куоластааһын буолла, элбэх киһи кытынна. Медицина киһитэ Саха сирин дьонун олоҕор үрдүк суолталааҕа көһүннэ дии саныыбыт. Алта ый устата 20 тыһыынча кэриҥэ киһи куоластаата”,- диэтэ “Саха сирин киэн туттуута” бириэмийэни сүрүннээччи Прокопий Бубякин.
Роман Романович маннык киэҥ билиниигэ тигистэр да, бэрт сэмэй. “Бу мин кэлэктиибим уопсай үлэтин түмүгэ” диир.
“Бу кыайыыга миэхэ куоластаабыт дьону эмиэ түмэбин. Биир дойдулаахтарым, аммалар, олус күүскэ үлэлээтилэр. Кыайыыбын куоластаабыт дьоҥҥо аныыбын”, – диэтэ Дьокуускай куорат 3№-дээх балыыһатын эндоскопия салаатын сэбиэдиссэйэ, “Медицина үлэһитэ” анал аат кыайыылааҕа Роман Васильев.
Элбэх киһини атаҕар туруорбут уопуттаах быраас инникитин даҕаны бары билиитин-көрүүтүн дьоҥҥо аныаҕа. Оттон норуот бириэмийэтэ кэлэр ыйга “Тутааччылар династиялара” диэн ааттанан, киэҥ хабааннаахтык тэриллиэ.
Источник: http://nvk-online.ru
