Москваҕа Саха сирин баһылыга Егор Борисов регион бырабыыталыстыбатын уонна парламенын бэрэссэдээтэллэрин кытта сүбэ мунньаҕы ыытта.
Егор Борисов былааннаах уоппускатыттан эрдэ тахсарын, чугастааҕы кэмҥэ кинини былаас федеральнай уорганнарын кытта ыкса ситимнээх үлэ күүтэрин туһунан иһитиннэрдэ. Кэлэр нэдиэлэ саҥатыгар Ил Дархан РФ үбүн миниистирэ Антон Силуановы кытта көрсүөҕэ. Ону тэҥэ кини муус устар 24 күнүгэр Арктика сайдыытын боппуруостарын Судаарыстыбаннай хамыыһыйатын президиумун мунньаҕар кыттыаҕа. Манна туһааннаах судаарыстыбаннай бырагырааманы олоххо киллэрии, РФ Арктикатааҕы зонатыгар сибээс өҥөтүн оҥорууга космическай спутниковай бөлөҕү сайыннарыы уо.д.а тиэмэлэри дьүүллэһиэхтэрэ.
СӨ Бырабыыталыстыбатын бэрэссэдээтэлэ Евгений Чекин Ил Дархаҥҥа бу сыл бастакы кыбаарталын түмүгүнэн экэниэмикэ сүрүн көрдөрүүлэригэр үрдээһин баарын туһунан иһитиннэрдэ. Чуолаан, баалабай регионнааҕы бородуукта 3,7 быр. улаатта, туһалаах сир баайын хостооһун улаатта: ньиэп – 12,5 быр., гаас конденсата – 24 быр., гаас – 4,5 быр., алмаас – 1,2 быр. Тутуу салаатыгар былырыыҥҥытааҕар 35 быр. элбэх олорор дьиэ үлэҕэ киирдэ .
“Экэниэмикэҕэ үтүө хамсааһын баара олус үчүгэй, — диэтэ Егор Борисов. – Бүддьүөт туолуутун туһунан ыйыппат буоларым табыллыбат, былырыын биһиги бүддьүөт үлэһиттэригэр хамнастарын үрдэтэр туһунан быһаарыы ылыммыппыт, ити 60 тыһыынчаттан тахса киһини таарыйыахтаах, ол эбэтэр 80 миллиард солкуобай”.
Мунньаҕы түмүктүүрүгэр Егор Борисов сүрүн сыалынан дьон тупсаҕай олохтонуутун хааччыйыы буоларын санатта. Онон хамнаска уонна социальнай төлөбүрдэргэ эбэһээтэлистибэлэр булгуччу туолуохтаахтар.
СИА.
