Россия мас-рестлиҥҥэ чөмпүйүөннэрэ 200-түү тыһыынчаны ылыахтара

0
49

Мас-рестлинг спорт биир кэрэхсэнэр көрүҥүнэн буолла. Өр сыллаах тохтобул кэнниттэн саха мадьынылара Россия чөмпүйэнээтин кыһыл көмүс мэтээлин барытын ылар кыахтаннылар. Манан сибээстээн, Саха сирин спорка салалтата “Модун” спорткомплекска пресс-кэмпириэнсийэ тэрийэн, кыайыылаахтары уруйдаата-айхаллаата. Көрсүһүүгэ спортсменнар, этэргэ дылы, аэропортан быһа кэллилэр.


Спорт национальнай көрүҥнэригэр өрөспүүбүлүкэтээҕи киин дириэктэрэ Иннокентий Григорьев суруналыыстарга мас-рестлинг инники күрэхтэһиилэрин туһунан билиһиннэрдэ. Чөмпүйэнээт кылаабынай судьуйата Владимир Шарин буолан ааспыт күрэхтэһии түмүгүн иһитиннэрдэ.

Оттон СӨ бырабыыталыстыбатын бэрэссэдээтэлин солбуйааччы, мас-рестлинг Бүтүн Россиятааҕы федерациятын бэрэсидьиэнэ Михаил Гуляев чөмпүйэнээккэ дойду 19 региона кыттыбытын уонна чөмпүйэнээт кэмигэр ыытыллыбыт федерация кэмпириэнсийэтин туһунан кэпсээтэ.

Россия хамаандатын сүрүн тренерэ Николай Константинов бэйэтин этиитигэр, Россия чөмпүйүөннэрэ аан дойду кубогар кыттарга бэлэмнэнэллэрин, онуоха эрчиллии бастакы түһүмэҕэ ыам ыйын саҥатыгар Алматы куоракка тэриллэрин, оттон чөмпүйэнээт призердара ити күрэхтэһиигэ бэйэлэрин суоттарыгар кыттыахтарын сөбүн эттэ.

СӨ Спорка миниистирэ Георгий Балакшин кыайыылаахтары эҕэрдэлээтэ уонна 200-түү, оттон кинилэр тренердэригэр 100-түү тыһыынча солк. сертификаттары туттарда. Бу, Саха Өрөспүүбүлүкэтин бырабыыталыстыбата спорду өйөөн, Олимпийскай оонньууларга, аан дойду, Россия чөмпүйэнээттэригэр бастаабыттары уонна миэстэлэспиттэри наҕараадалыыр туһунан дьаһалыгар сөп түбэһиннэрэн оҥоһулунна.

www.edersaas.ru

0
0

Хоруй суох

Хоруйдаа