Мэҥэ-Хаҥаластан төрүттээх хараҕынан мөлтөхтүк көрөр спортсмен, Арассыыйа үтүөлээх тренерэ Петр Давыдов иитиллээччитэ Людмила Пахомова Брянскайга ыытыллыбыт Арассыыйа пауэрлифтиҥҥа чөмпүйэнээтиттэн икки кыһыл көмүс мэтээллээх кэллэ. Людмила пауэрлифтиҥҥа итиэннэ сытан эрэ өрө анньыыга чөмпүйүөннээтэ. Үчүгэйэ диэн кини көрдөрүүлэрэ спорт маастарын кандидатын нуорматыгар эппиэттэһэллэр.
Спорт Якутии суруйарынан Арассыыйа пауэрлифтиҥҥа чөмпүйэнээтэ хараҕа суохтар спортарын федерацияларын көҕүлээһининэн икки көрүҥүнэн: сытан эрэ өрө анньыыга уонна троеборьеҕа ыытылыбыт. Күрэхтэһиигэ барыта 70 спортсмен кыттыбыт.
Людмила Пахомова махталын бастатан туран тренеригэр, Арктикатааҕы тыа хаһаайыстыбатын университетыгар, төрөппүттэригэр, биир дойдулаахтарыгар биллэрдэ.
Инникитин Людмиланы Арассыыйа Кубога күүтэр. Турнирга 150 спортсмен кыттара былааннанар.
