Аҕа дойду улуу сэриитигэр кыайыыны уһансыбыппыт 75 сыла. Сэрии диэни билбэтэх элбэх көлүөнэ дьон төрөөн улаатта. Хаҥалас улууһун Улахан Аан нэһилиэгэр күн бүгүн олорор ытык кырдьаҕастар, сэрии кэмин оҕолорун ахтыыларын хомуйан, 2020 сылы көрсө кинигэ таҕыста.
Хаҥалас улууһун баһылыга Гаврил Алексеев оройуоҥҥа оҕо хамсааһынын өйүүр. “Эрэл” оҕо түмсүүтэ 30 000 солкуобайдаах граны ылан, “Сэрии оҕолоро” бырайыагынан кинигэ бэчээттэттэ.
Бырайыакка оскуола учууталлара Яковлева Л.Я., Васильева М.Н., Терентьева Р.Н., Григорьева Н.С., Сидорова Л.С., Максимова П.И., Максимов В.С. үлэлэстилэр, ону тэҥэ ахтыылары бэлэмнээһиҥҥэ бэтэрээннэр дьиэ кэргэттэрэ көмөлөстүлэр.
Бырайыакка “Малдьаҕар 2-с нэһилиэгэ” МТ дьаһалтата көмөлөһөн, сэрии кэмин оҕолоругар барыларыгар анал чааскы оҥотторон бэлэхтээтэ.
Бырайыак сүрүн геройдарынан оскуола үөрэнээччилэрэ буолаллар. Учууталлары кытта төлөпүөн, фотоаппарат, ручка, блокнот тутуурдаах бэтэрээннэргэ сылдьан, кинилэр олохторун туһунан кэпсээннэрин диктофоҥҥа уһулан, хаартыскаҕа, видеоҕа түһэрэн, араас ыйытыылары биэрэн, матырыйаал тахсарыгар бэйэлэрин кылааттарын киллэрдилэр. Оҕолор аҕа саастаах дьону кытта алтыһан, кинилэр санааларын-оноолорун, оҕо саастарын туһунан элбэҕи биллилэр. Түмүгэр кинигэ тахсыбытын көрөн, олус астыннылар.
Кинигэ сыралаах үлэттэн бэчээттэнэн тахсарын оҕолор бу бырайыак көмөтүнэн өйдөөтүлэр. Атыыламмыт кинигэ харчытынан Арассыыйатааҕы оскуола оҕолорун хамсааһынын галстуктарын атыылаһары былаанныыллар.
«Онон улуус баһылыгын граныгар кыттан, олус туһалаах, интэриэһинэй 2019 сылы атаардыбыт. Бу кинигэни кинилэр оҕолоро, сиэннэрэ, аймахтара, нэһилиэк олохтоохторо, үөрэнээччилэрэ ааҕан, элбэҕи билиэхтэрэ дии саныыбыт», — диэн СИА-ҕа Надежда Громова, М.Е. Васильева аатынан 2-с Малдьаҕар орто оскуолатын
эбии үөрэхтээһинин педагога иһитиннэрдэ.
