Бу күннэргэ Уус-Ньараҕа “Өймөкөөн улууһа (оройуона)” МТ дьаһалтатын баһылыгын Граныгар педагогическай үлэһиттэр улуустааҕы куонкурустара ыытылынна. Учууталлар иитээччилэр уонна кылаас салайааччылара тус-туһунан арахсан икки күн устата бастыҥы быһаардылар.
Куонкуруска кыттааччы учууталлар аһаҕас уруоктары ыыттылар, “Мин – учууталбын” диэн эссе билиһиннэрдилэр, “Мин барытын сатыыбын” айар куонкуруска кытыннылар. Оттон оҕо уһуйаанын иитээччилэрэ маастар-кылаас көрдөрдүлэр, бэйэлэрин бырайыактарын көмүскээтилэр. Кылаас салайааччылара эмиэ куонкуруска идэлэригэр туох баар сатабылларын көрдөрдүлэр.
Тэрээһин түмүктүүр үөрүүлээх дьаһалга улуустааҕы Үөрэх управлениетын начаалынньыга Надежда Шилова, управление исписэлиистэрэ, үөрэх тэрилтэлэрин салайааччылара кытыннылар.
Дьүүллүүр сүбэ быһаарыытынан улуус баһылыгын Гранын хаһаайынынан Сордоҥноох орто оскуолатын омук тылын учуутала Алена Борисова буолла. 2-с истиэпэннээх дипломунан Уус-Ньаратааҕы гимназия омук тылын учуутала Айгуль Гарипова, 3-с истиэпэннээҕинэн Томтор орто оскуолатын физкультура учуутала Ульяна Винокурова наҕараадаланнылар.
Онтон “Иитээччи-2018” аатын Уус-Ньаратааҕы “Березка” оҕо саадын иитээччитэ Александра Тарутина ылла. Уус-Ньаратааҕы уһуйааннар иитээччилэрэ Марфа Винокурова уонна Анастасия Юрова иккис уонна үһүс истиэпэннээх дипломнары туттулар. Куонкуруска Уус-Ньаратааҕы “Петушок” оҕо саадыгар саҥардыы үлэлээн эрэр Алина Стручкованы тэрийээччилэр биһирээтилэр, бары көрүҥнэргэ үрдүк баалы ылбытын иһин “Эбии үөрэхтээһин педагога-2018” номинацияны иҥэрдилэр. Онтон “Сыл бастыҥ кылаас салайааччыта” номинацияҕа икки кыайыылаах ааттанна — Томтор орто оскуолатын история уонна обществознание учуутала Саргылаана Сергеева уонна Уус-Ньаратааҕы гимназия информатика учуутала Александр Притула.
“Өймөкөөн улууһа (оройуона)” МТ дьаһалтатын баһылыгын Граныгар ыытыллыбыт куонкурус кыайыылаахтара, кыттааччылар бары дипломнарынан, сертификаттарынан бэлиэтэннилэр. Маны таһынан улуус педагогтарыгар Үөрэх управлениетын идэлээх сойууһун аатыттан харчынан бириэмийэ, Уус-Ньара урбаанньыттарын бириистэрин уонна улуустааҕы хаһыаттарга босхо сурутуу сертификатынан наҕараадаланнылар.
Улуус баһылыгын Михаил Захаров Гранын хаһаайына, бастыҥ учуутала Сордоҥноох орто оскуолатын учуутала Алена Борисова үөрүүтүн маннык үллэһиннэ:
— Мин Сордоҥноох орто оскуолатыгар английскай тыл учууталынан үлэлээбитим биэс сыл буолла. Улуус таһымнаах куонкуруска бастакыбын кытынным. Бииргэ үлэлиир кэллиэгэлэрим миигин көҕүлээн, бэйэбэр эрэнэн маннык улахан куонкуруска кыттан кыайыылаах буолбуппуттан олус үөрдүм, долгуйдум. Улууспутугар үрдүк таһаарыылаахтык үлэлиир учууталлар баалларын көрөн-истэн, эдэр учуутал буоларым быһыытынан үтүө уопут ылынным. Уус-Ньаратааҕы гимназия 6-с кылааһын үөрэнээччилэригэр английскай уонна кытай тылынан уруок биэрбитим кыайыыны ситиһэрбэр улаханнык сабыдыаллаата дии саныыбын. Гимназияҕа кытай тылын үөрэппэттэр эбит. Ол да буоллар, оҕолор олус интэриэһиргээн, сонурҕаан уруокка көхтөөхтүк кытыннылар.
