М.К. Аммосов аатынан хотугулуу-илиҥҥи федеральнай университет байыаннай үөрэтэр киинигэр саппааска сержаннары бэлэмниир бырагырааманан курсааннары ылыы саҕаланна.
Кулун тутартан саҕалаан үөрэх туһунан иһитиннэрэр үлэ ыытыллар.
Курсааннар үөрэҕи бүтэрэллэригэр байыаннай билиэти илиилэригэр туталлар. Кинилэр саппааска киирэллэр уонна армияҕа сулууспаҕа ыҥырыллыбаттар.
Байыаннай үөрэтэр кииҥҥэ киириигэ баҕалаахтар хас да түһүмэҕи ааһаллар. «Кандидаттар Дьокуускай байыаннай комиссариатыгар байыаннай-быраас хамыыһыйатын ааһаллар. Ол кэннэ физическай бэлэмин уонна үөрэҕин көрөллөр. Бу түһүмэхтэри ситиһиилээхтик эрэ ааспыттар кииҥҥэ үөрэнэр бырааптаналлар», — диэн киин начаалынньыга Геннадий Сысоев эттэ.
Үөрэххэ хомуур 2024 сыл балаҕан ыйыттан саҕаланар, икки сыл болдьохтоох (түөрт семестр).
Курсааннар нэдиэлэҕэ биирдэ «байыаннай күн» ньыманан үөрэнэллэр.
