Хаҥалас улууһугар үс күннээх кутурҕан күнэ биллэрилиннэ. Бэҕэһээ киэһэ 21:41 чааска Чапаево нэһилиэгэр икки этээстээх элбэх кыбартыыралаах олорор дьиэ умайбытын түмүгэр түөрт киһи суорума суолланна, ол иһигэр 2017, 2018 сыллаах төрүөх оҕолор.


Улуус баһылыга Олег Иринеев эчэйбиттэргэ, сүтүктээхтэргэ дириҥ кутурҕанын тиэртэ.

«Дьиэтэ-уота суох хаалбыт дьоммутугар көмөлөһөр биһиги сүрүн сорукпут», — диэтэ баһылык. Кини билигин 9 киһи наукалар Аччыгый Академияларын интэринээтигэр, атыттар аймахтарынан олохсуйбуттарын иһитиннэрдэ.

«Дьаһалта исписэлиистэрэ олохтоохторго уокка былдьаммыт докумуоннарын чөлүгэр түһэриигэ көмөлөһүөхтэрэ, биир күннээх хамнаспытын ыытыахпыт», — диэтэ улуус баһылыга. Кини ити бачыымы улуус тэрилтэлэрэ өйүөхтэригэр эрэнэрин биллэрдэ. Оройуон бүддьүөтүн саппаас пуондатыттан тус көмө оҥоһуллуон эттэ.

«Алдьархайынан сибээстээн улууска үс күннээх кутурҕан күнүн биллэрэбин. Бу күннэргэ судаарыстыбаннай былаахтар түһэриллиэхтэрэ итиэннэ култуурунай – сааратар тэрээһиннэр тохтотуллуохтара», — диэтэ баһылык Олег Иринеев.

Билигин балыыһаҕа түөрт киһи эмтэнэ сытар, биэс киһи таһыттан. Сүтүктээхтэри кытары психологтар үлэлииллэр.

Умайбыт дьиэ 1997 сыллааҕы тутуу. Үксүн эдэр ыаллар олорбуттар. Уопсайа 68 киһи көһөрүллүбүт. Билигин баһаар туохтан барбытын, буруйдаах дьон быһаарыллаллар.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.