Үөһээ Бүлүү бөһүөлэгин улахан тэрилтэтэ ОДьКХ быйыл үбүлүөйдээх 60 сылын көрсөргө тэтимнээхтик бэлэмнэнэр. Ол курдук, Бэрэ территориятыгар, тэрилтэлэрин таһыгар бэтэрээннэригэр аналлаах сквер тутулла турар.
Үбүлүөйгэ уонна ХХ Манчаары оонньууларыгар аналлаах сквергэ паарынан оттуллар хочуол саҥалыы, иккис тыыннанан туруорулунна. Маннык хочуол ааспыт үйэҕэ олохтоохтору итиинэн уонна уотунан хааччыйара.
Саҥа сквер олорор сирдээх, сибэккилээх буолуоҕа. Сквергэ бэтэрээннэр хаартыскалара үйэтитиллиэҕэ. Бу оҥоһуу 500 тыһ. солк. сыаналаах. Үөрүүлээх арыллыыта от ыйын саҥатыгар, ОДьКХ үлэһиттэрин ыһыаҕын кэмигэр ыытыллыаҕа.
Хаһаайыстыба кылаабынай инженера Анатолий Тимофеев: «Маны сэргэ, тэрилтэ дьиэтин таһын эпсиэйдии сылдьабыт, саҥардыыга эмиэ 500 тыһ. солк. көрүллүбүтэ. Итиэннэ былааҥҥа олбуор уларытыыта баар. Быйыл сайын тэрилтэ тулатын сибэккинэн толорор былааннаахпыт, 400 сибэкки арассаадатын үүннэрдибит. Тупсарыныыга тэрилтэ үлэһиттэрэ күргүөмүнэн кытталлар, үлэлиир сирдэрэ киэргэйэригэр бары күүстэрин уураллар», — диэтэ.
ХХ Манчаары оонньууларын көрсө улууспутугар «Ийэ скверэ», «Предпринимателлэр сквердэрэ» тутуута былааннанар. Маны сэргэ, сүдү киһибит, общественнай-политическай деятель И.Н.Барахов болуоссата оҥоһулларын күүтэбит.
