Балаҕан ыйын 9 күнүгэр Үөһээ Бүлүү историятыгар биир умнуллубат кэрэ-бэлиэ түгэн үүннэ. Ол курдук, Үөһээ Бүлүү улууһун баһылыга Владимир Поскачин туруорсуутунан, СӨ Бырабыыталыстыбатын дьаһалынан, өрөспүүбүлүкэ нэһилиэнньэтин олоҕор-дьаһаҕар куттал суох буолуутун хааччыйар государственнай комитет көрдүүр-быыһыыр сулууспатын Бүлүүтээҕи подразделениета улуус киинигэр арылынна. Бүлүү уонна Үөһээ Бүлүү улуустарын хабан үлэлиир тэрилтэ салайааччытынан Михаил Ан ананан, үлэлэрэ былааннаахтык ыытыллар.
«СӨ быыһыыр сулууспата» ГКТ Саха сиригэр 1993 сыллаахтан тэриллэн үлэлиир. Ыксаллаах быһыы-майгы тахсар түбэлтэтигэр үлэлиир уопсайа түөрт этэрээттээх, кинологическай расчеттаах уонна улуустааҕы түөрт этэрээттээх (Алдан, Нерюнгри, Орто Халыма уонна Бүлүү бөлөх оройуоннарыгар). Бүгүҥҥү күҥҥэ дьон олоҕун, баайын-дуолун быыһыырга аналлаах суһал көмөнү оҥорорго өрүү бэлэм аэромобильнай, автомобильнай, уулаах оъектарга үлэлиир водолазнай, айылҕа оҥорор содулларын туоратарга аналлаах дэлби тэптэрии үлэлэрин ыытар уонна кинологическай расчет курдук этэрээттэр күннэтэ бэйэлэрин олохторун толук ууран туран, дьон олоҕун быыһыырга өрүү бэлэмнэр.
Бу үөрүүлээх күнү көрсө ыҥырыылаах ыалдьыттарынан өрөспүүбүлүкэ нэһилиэнньэтин олоҕор-дьаһаҕар куттал суох буолуутугар государственнай комитет бэрэссэдээтэлэ Юрий Зайцев, «СӨ Быыһыыр сулууспата» государственнай казеннай тэрилтэ салайааччыта Николай Находкин, СӨ баһаары утары сулууспа салайааччыта Николай Иванов, улуус баһылыга Владимир Поскачин, улуус Сэбиэтин бэрэссэдээтэлэ Семен Михалев буоллулар. Саҥа тэрилтэ дьиэтин «Душа России» национальнай бириэмийэ хаһаайына, СӨ култууратын үтүөлээх үлэһитэ, норуот маастара, олоҥхоһут, алгысчыт Кириил Никииппэрэп алгыс анаан, аал уоту айах тутта.
«СӨ Быыһыыр сулууспата» государственнай казеннай тэрилтэ салайааччыта Николай Находкин: «Бүлүү бөлөххө көрдүүр-быыһыыр сулууспаны тэрийэр туһунан баҕа санаабыт бүгүн туолла. Урукку өттүгэр ыксаллаах быһыы-майгы тахсар түгэнигэр, анал специалистар Дьокуускай куораттан кэлэллэрэ. Дьон олоҕор куттал суоһуур түбэлтэтигэр, быыһыыр сулууспа чугас буолара олус наада. Саҥа тэриллибит тэрилтэбит ыччаты кытары күүскэ ылсан үлэлиэҕэ диэн эрэлбит улахан. Бүгүҥҥү тэрээһиҥҥэ кыттыыны ыла кэлбит, инники өттүгэр олохторун дьону быыһыырга аныыр санаалаах оҕолор кэлбиттэрин көрөн олус үөрдүм», — диэн туран, тэрилтэ дьиэтин тутуутугар үлэлээбит улуус кылаабынай архитекторыгар Родион Ефремовка, ИП Алексей Захаровка, Василий Ивановка СӨ быыһыыр сулууспатын аатыттан махтал суруктары туттарда.
СӨ Быыһыыр сулууспатыгар өр сылларга таһаарыылаахтык салайааччынан үлэлээбит Евгений Васильевич Барышев: «Я вспоминаю 1993 год, когда в республике создавался отряд. Нас было 7 спасателей, вас сейчас больше, чем в республике было в 93-м году. В первые годы у нас не было ни одного выезда, потом в 1995 году была проведена первая поисково-спасательная работа. Годы летели, и вот к концу 90-х годов количество поисково- аварийно-спасательных работ превысило тысячу. Сейчас наблюдаю, как растет, расширяется система поиска и спасения, в душе становится радостно потому, что по жизни мы все спасатели. Все живем в экстремальных, непригодных для проживания человека условиях. Тем не менее, данный отряд создан, благодаря Правительству, главе района Большому кораблю — большого плавания!»
Нэһилиэнньэ олоҕор-дьаһаҕар куттал суох буолуутугар государственнай комитет бэрэссэдээтэлэ Юрий Зайцев Бырабыыталыстыба аатыттан Бүлүү бөлөх улуустарыгар көрдүүр-быыһыыр сулууспаны тэрийиигэ, саҥа дьиэтин тутуутугар күүскэ ылсан үлэлэспит улуус баһылыгар Владимир Поскачиҥҥа, ИП Николай Семеновка, УПС МКУ директорыгар Александр Типановка, Николай Ильиҥҥэ махтал суруктары туттарда.
