Үөһээ Бүлүүгэ оҕо-үөрэх тэрилтэлэригэр 11 мөл. 250 тыһ. солк. суумалаах өрөмүөн үлэтэ ыытыллар. Аҥардас «Солнышко» оҕо саадын өрөмүөнүгэр 3,5 мөл. солкуобай көрүллүбүт.
Үөһээ Бүлүүтээҕи үөрэх управлениетын сүрүннүүр инженерэ Платон Семенов кэпсээбитинэн, республика бюджетыттан анаммыт үпкэ эбии улуус бюджетыттан көрөн, 2 мөл. солк. суумаҕа алта оскуолаҕа өрөмүөн ыытыллар. Туобуйа орто оскуолата ититэр ситимин, Хомустаах оскуола-саада спортивнай саалатын акылаатын уонна Куду оскуола-саада сарайын уларытар үлэтин номнуо түмүктээн туттарбыттар. Билигин Быракаан ситэтэ суох уонна Далыр орто оскуолаларын спортивнай саалаларын, Дүллүкү орто оскуолатын ититэр ситимин өрөмүөннээһин бара турар.
«9 мөл. 250 тыһ. солк. суумалаах өрөмүөн үлэтэ 5 оройуон киинин уонна Нам, Маҥаас нэһилиэгин оҕо саадтарыгар ыытылла турар. Бу үбүлээһин улуус бюджетыттан 20-с Манчаары оонньууларын көрсө ыытыллар үлэҕэ сыһыаннаан анаммыта. Бары үөрэх тэрилтэлэрин өрөмүөнэ атырдьах ыйын 20 күнүгэр түмүктэниэхтээх. Оттон 8 №-дээх «Аленушка» оҕо саада контрагын хойутуу баттаспыт буолан, атырдьах ыйын 30 күнүгэр үлэтин түмүктээн туттарар былааннаах. Маны таһынан атын оҕо үөрэх тэрилтэлэрэ бэйэлэрин үптэринэн араас таһымнаах өрөмүөн үлэтин ыыта сылдьаллар», — диэн Платон Иванович кэпсээтэ.
Улахан өрөмүөн үлэтэ 6 №-дээх «Солнышко» оҕо саадыгар ыытыллар. Ол курдук, акылаатын, муостатын толору уларытан, ититэр ситимэ саҥаттан тардыллыахтаах. Маны таһынан оҕо саадын территориятын эргийэр олбуор саҥардыллан оҥоһуллуохтаах.
