Таатта улууһун Уус-Амма нэһилиэгэр, Амма өрүс үрдүгэр үҥкүүлүү сылдьар кыталыктар пааматынньыктара турда. Бу туһунан СИА иһитиннэрэр.
Пааматынньыгы эдэр тимир уустара Семен Хоютанов уонна Радислав Евлев оҥорбуттар. Семен тыа хаһаайыстыбатын салайааччыта, Радислав үлэ уруогун учуутала. Эдэр дьон өйдөбүнньүк бэлиэни бэйэлэрин баҕаларынан оҥорон, дойдуларыгар бэлэх ууммуттар.
Ураты пааматынньыгы быраҕыллыбыт массыына сэмнэҕиттэн оҥорбуттар. Оҥоһук биэс миэтэрэ кэриҥэ үрдүктээх. Пааматынньыгы Амма өрүс үрдүгэр кэлэр-барар дьон алгыс ылан ааһарын курдук туруорбуттар.
«Эдэр дьон оҥорбут бэлэҕэ төрөөбүт дойдуга таптал, бэриниилээх буолуу, айылҕаҕа харыстабыллаах сыһыан бэлиэтэ», — диэн Уус-Амма нэһилиэк баһылыгын солбуйааччы Петр Колодезников этэр.
Уолаттар 2025 сыллаахха буолуохтаах Манчаары ооньууларын көрсө өссө атын оҥоһуктары туруоран, дойдуларын киэргэтэр баҕа санаалаахтар.
