Балаҕан ыйын 6 күнүгэр Саха сирин Ил Дарханын э.т. Айсен Николаев үлэтин Үөһээ Бүлүү улууһугар салҕаата. Кэнники сылларга улууска урбаан үлэтэ уонна олохтоох оҥорон таһаарыы тэтимнээхтик сайдар. Олохтоох ыччат тыа сирин чөлүгэр түһэрээри, дьоҕус биисинэс кэскиллээх салаатын баһылыыллар.
Үөһээ Бүлүү сэлиэнньэтигэр Айсен Николаев чараас истиэнэлээх чэпчэки ыстаал конструкциялары оҥорон таһаарар дьоҕус собуот үлэтин билистэ. “Оҥорон таһаарыыбытын кэҥэтэр баҕалаахпыт, тоҕо диэтэххэ, элбэх сакаас киирэр. Билигин оройуон уопсай үөрэхтээһин 8 тэрилтэтин сакааһын толоробут”, — диэн кэпсээтэ регион Ил Дархан э.т. эдэр урбаанньыт Александр Семенов.
Нам сэлиэнньэтигэр Айсен Николаев көөнньүбүт үүттэн оҥоһуллубут “Уох” күүһү биэрэ утаҕы оҥорор дьоҕус собуокка сырытта. Бу утаҕы нэһилиэнньэ олус сөбүлүүрүн туһунан эдэр урбаанньыт Александр Иванов кэпсээтэ. Кини утаҕы чугастааҕы оройуоннарга илдьэн атыылыыр баҕалаах.
“Эдэр урбаанньыттар олохтоох оҥорон таһаарыыны арыйан уонна сайыннаран, олохтоох бүддьүөккэ нолуок төлүүллэр, үлэ миэстэтин таһаараллар, онон оройуон сайдыытыгар бэйэлэрин кылааттарын киллэрэллэр”, — диэн бэлиэтээтэ Айсен Николаев.
Нам сэлиэнньэтигэр Айсен Николаев П.Н.Тобуруокап аатынан орто оскуола саҥа дьиэтин көрдө, учууталлары уонна үөрэнээччилэри кытта көрүстэ. Саҥа дьиэ быйыл олунньуга үлэҕэ киирбитэ. Киэҥ-куоҥ технология, робототиэхиньикэ, мастарыскыайдар аныгы тэрилинэн хааччыллыбыттара.
“Үөһээ Бүлүү оройуона Бүлүү умнаһынааҕы улуустар ортолоругар биир сүрүн миэстэни ылар. Оройуон сиригэр-уотугар бөдөҥ бырамыысыланнай оҥорон таһаарыы суох буолан, муниципальнай былаастар хаһааыстыбаннай комплекс, аграрнай сектор салааларын көдьүүһүн үрдэтэр, олохтоох оҥорон таһаарыыны өйүүр, социальнай инфраструктураны сайыннарар баҕалаахтар. Бу үлэ кэлимсэтик ыытылыннаҕына, дьон олоҕун таһымын үрдэтиигэ уонна нэһилиэнньэ үлэлээх буолуутугар көмөлөһүөҕэ”, — диэтэ Айсен Николаев Үөһээ Бүлүү улууһун социальнай-экономическай сайдыытыгар анаммыт мунньах түмүктэринэн.
