СӨ салалтата уонна Канада пааркатын Агентствота Саха сиригэр бизоннары аҕалыыга Сөбүлэҥҥэ илии баттастылар. Дьыалабыай көрсүһүүгэ бырабыыталыстыба бэрэссэдээтэл солбуйааччыта Кирилл Бычков салайааччылаах бөлөх кытынна.
Ойуур бизоннарын ууһатыыга норуоттар икки ардыларынааҕы кэмитиэти кытта өрөспүүбүлүкэ бииргэ үлэлиир. Саха сирин бырабыыталыстыбата, Канаада пааркаларын Агентствота уонна Канаада тулалыыр эйгэҕэ министиэристибэтэ сөбүлэҥнэригэр олоҕуран, 2006, 2011 уонна 2013 сылларга үс түһүмэҕинэн 90 ойуур бизона Саха сиригэр аҕалыллыбыта.
Саха сиригэр икки анал питомник тутуллубута — «Уус-Буотама» Хаҥалас улууһугар уонна «Тыымпынай» Горнай оройуонугар. Кыыллар Саха сирин усулуобуйатыгар адаптацияны ааһыылара үчүгэйинэн сибээстээн, сыл аайы 20-25 бизону аһаҕас айылҕаҕа ыытарга былааннанар. Бастакы бизоннар 2017 сыллаахха алтынньыга көҥүлгэ таһаарыллыбыттара. Билигин Саха сиригэр 220 төбө баар.
Өрүттэр баттаспыт сөбүлэҥнэригэр олоҕуран, 2020 сылга Саха сиригэр 30 кыылы аҕалыахтара.
«Саха сирэ 20-чэ сыл ойуур бизонун бэйэтин айылҕатыгар иитиигэ, ууһатыыга үлэлиир. Бары инфраструктурата тэриллэн турар. Канаадаттан эбии бизоннары аҕалыы — икки өттүттэн исписэлиистэр дьаныардаах үлэлэрин түмүгэр оҥоһуллар. Экология эйгэтигэр Россия — Канада бииргэ үлэлээһиннэрин чаҕылхай холобура буолар», — Кирилл Бычков бэлиэтээтэ.
