М.К.Аммосов аатынан Хотугулуу-Илиҥҥи федеральнай университекка 2020-2021 үөрэх дьылыгар туттарсыы быраабылата бигэргэннэ. Туох уларыйыы киирдэ?  


Үрдүк үөрэххэ туттарсыы быраабылата сыллата алтынньыга номнуо биллэр. Оскуоланы бүтэрээччилэр эксээмэни талалларыгар онон сирдэтинэллэр. Хотугулуу-Илиҥҥи федеральнай университет эһиил үөрэххэ туттарсыыга докумуону, өрүү буоларыныы, бэс ыйын 20 күнүттэн саҕаланыаҕа. Туох саҥа уларыйыылар киирбиттэрин туоһулаһаары ХИФУ киин тутар хамыыһыйатын кытта сибээстэстибит.

“Эһиилги үөрэх дьылыгар 3549 бүддьүөт миэстэтэ көрүлүннэ. Итинтэн 2772-тэ бакалавриакка уонна специалитекка. Оннук улахан тосту-туора уларыйыы суох. Арай, урукку сылларга математика алын баала хайысхаларынан араас эбит буоллаҕына, 2020-2021 үөрэх дьылыгар туттарсыыга барыларыгар биир буолуоҕа — 39 баал. Итиэннэ тус ситиһии иһин аахсыллар олимпиада испииһэгэ элбээтэ, ааҕыллар бааллара кыратык уларыйдылар. Аҕыйах саҥа идэ эбилиннэ. Холобур, Автодорожнай бакылтыакка “наземные транспортно-технологические средства” специалитет”, — диэн киин тутар хамыыһыйаҕа иһитиннэрдилэр.

Үөрэххэ туттарсыы болдьоҕун, ханнык докумуоннар ирдэнэллэрин, тус ситиһиигэ туох киирсэрин, о.д.а. туһунан сиһилии ХИФУ сайтыттан билсиэххитин сөп.  Санатан эттэххэ, университет 12 институттаах, 5 бакылтыаттаах, 3 филиаллаах уонна 2 кэллиэстээх.

Людмила ПОПОВА, “Саха сирэ” хаһыат, edersaas.ru

0
0
comments powered by HyperComments