Нам улууһун Кириэс-Кытылыгар Е. М. Шапошников аатынан Хамаҕатта орто оскуолата саҥа 220 миэстэлээх дьиэтэ арылынна. Оскуола икки этээстээх, үс туспа блоктан турар: үөрэнэр дьиэлэр, спортивнай саала, 50 миэстэлээх интернат. Сэлиэнньэ олохтоохторун үөрүүлээх күннэринэн Саха сирин бырабыыталыстыбатын бэрэссэдээтэлин солбуйааччы Сергей Местников эҕэрдэлээтэ уонна «Саха тылын, литературатын уонна культуратын кабинета» комплект туттарда.
Оскуола директора Анатолий Дьяконов этэринэн, быйылгы үөрэх дьылыгар политехническай, гуманитарнай, естественнэй, спортивнай хайысхаларга кылаастар арылыннылар. Федеральнай бырагырааманан цифровой үөрэх эйгэтэ тэриллэн, «Точка роста » диэн цифровой уонна гуманитарнай профиль үөрэҕин киинэ аһылынна.
Хамаҕатта оскуолата эһиил 90 сыллаах үбүлүөйүн бэлиэтиэҕэ. Бу кэмҥэ 270 оҕо 15 кылааска үөрэнэр. Коллектив 57 үлэһиттээх, олортон 33 педагог. Эбийиэк «Аныгы оскуола» нацбырайыак «Үөрэҕирии» федеральнайдааҕы бырайыак чэрчитинэн тутулунна.
Өрөспүүбүлүкэ баһылыга Айсен Николаев бэлиэтээбитинэн, «Үөрэҕирии» национальнай бырайыак көмөтүнэн Саха сирин оройуоннарыгар уонна куораттарыгар саҥа эбийиэктэр тутуллаллар, аныгылыы үөрэнэр сирдэр айыллаллар.
Хаартыска: Василий Кононов.
