Намнар киэн туттар биир дойдулаахпыт, Саха АССР уонна РСФСР үтүөлээх учуутала, Аҕа дойду Улуу сэриитин кыттыылааҕа уонна ветерана, «Кыһыл сулус», «Аҕа дойду сэриитэ», «Бочуот знага» уордьаннар кавалердара, общественнай деятель Захар Прокопьевич Саввин аатын сүгэр Үөдэй орто оскуолатын тэриллибитэ 100 сыллаах үбүлүөйүн бэлиэтээтибит.
XX-с үйэ саҕаланыытыгар, 1919 сыллаахха, Үөдэйтэн 40 км ыраах Бардыалаах диэн сиргэ алын сүһүөх оскуолата арыллан үөрэхтээһин тэриллибитэ. Онно салайааччынан Дьокуускайдааҕы епархиальнай дьахтар училищетын выпускницата А.В. Попова үлэлээбитэ. Оскуола оччотооҕу сэбиэтэ, үөрэнээччилэр төрөппүттэрэ оскуола төрүттэнэн олохсуйуутугар, тэрээһин боппуруостарыгар сүҥкэн кылааттарын киллэрэн, кэнники Үөдэй нэһилиэгэр көһөрөн аҕалаллар. Онтон ыла үгүс сыллар усталарыгар оскуола олох бары уларыйыытын-тэлэрийиитин, түһүүтүн-тахсыытын кытта тэҥҥэ хардыылаан, кэмигэр сөптөөхтүк дьаһанан үлэлээн кэллэ. Үөдэй орто оскуолата улууска эрэ буолбакка, республикаҕа, дойдуга ыытыллар араас куонкурустарга, тэрээһиннэргэ, граннарга кыттан үгүс элбэх ситиһиилэрин киһи ааҕан сиппэт.
Үөрүүлээх тэрээһин оскуола үөрэнээччилэрэ, коллектива кыттыылаах «Лыҥкынас көмүс тойуга» диэн театрализованнай дьүһүйүүнэн саҕаланна. Оскуола хайдах төрүттэнэн, араас кэрдиис-кэмнэри ааһан, күн бүгүнүгэр диэри тигинэччи үлэлии олорорун оонньоон-ойуулаан көрдөрдүлэр.
Үөрүүлээх тэрээһиҥҥэ мустубут оскуола коллективын, ветеран учууталлары, араас сылларга бүтэрбит выпускниктары уонна билигин үөрэнэ сылдьар үөрэнээччилэри оскуола директора Вероника Барашкова, улуус баһылыга Юрий Слепцов, СР Ил Түмэн Государственнай мунньаҕын депутата, судаарыстыба тутулугар уонна сокуону оҥорууга сис комитетын председателэ Алексей Еремеев, СР Ил Түмэн Государственнай мунньаҕын депутата Наталья Румянцева о.д.а. баай историялаах оскуола 100 сылынан эҕэрдэлээтилэр.
Оскуола дьоһун ситиһиитэ, киэн туттуута, албан аатырыыта үөрэнээчилэрин ситиһиититтэн көстөр. Оттон Үөдэй выпускниктара үлэ-хамнас бары хайысхаларыгар ситиһиилээхтик үлэлии-хамсыы сылдьалларыттан үөрэбит уонна киэн туттабыт диэн үөрэ кэпсээтилэр.
Үөдэй оскуолатыгар үлэлии сылдьыбыт учууталлар, салайааччылар уонна ыраахтан-чугастан кэлбит хас эмэ көлүөнэ выпускниктар оскуола педколлективыгар бэйэлэрин эҕэрдэ тылларын анаатылар, алгыстарын үтүөтүн эттилэр.
Ааптар: Анна Созонова, Нам улууһа
