«Бу инвестбырайыактар чэрчилэринэн 1 тыһ. тахса тэрилтэ үлэҕэ киирдэ, 180 тыһ. тахса үлэ миэстэтэ тэрилиннэ. Былырыын пуорумҥа аан дойду 75 дойдутуттан 8 тыһыынча кыттааччы сылдьыбыта”, — диэтэ Трутнев.
Мунньахха дьыалабыай бырагыраама, куорат инфраструктуратын бэлэмнээһин туһунан кэпсэттилэр. Дьыалабыай бырагыраамаҕа энергетика уонна тырааныспар инфраструктуратын сайыннарыы боппуруостарын чопчулаатылар. Кэтэх инвестицияны тардыыны, судаарыстыба өйөбүлүн, каадыр бэлиитикэтин дьүүллэһиэхтэрэ.
Уһук Илин куораттарын маастар-былааннарын олоххо киллэриини көрүөхтэрэ. ВЭФ аһыллыытыгар “День сокола” төрдүс норуоттар икки ардыларынааҕы пуорум буолуоҕа. “Улица Дальнего Востока” быыстапка күүтүллэр.
Саха сирин Ил Дархана Айсен Николаев Арассыыйа Бэрэсидьиэнэ Владимир Путин былырыын бэлиэтээбитин аҕынна. Онно этиллибитинэн, кэнники 10 сылга Уһук Илин экэниэмикэтигэр 20 трлн инвестиция тардыллыбыт. Онно лиидэринэн 4,5 трлн. сүрүн хапытаалга инвестициялаах Саха сирэ буолар.
Санаттахха, 10 сыл устата ВЭФ кэмигэр Саха сирэ 250 тахса сөбүлэһиини түһэрсибит, ити уопсай суумата 1 трлн. куоһарар. Былырыын Саха сирэ 106 млрд. солкуобайдаах 27 сөбүлэһиини түһэрсибит. Маныаха инвестиция бартыбыала 641 млрд. солкуобайга тэҥнэспит. XI Илиҥҥи экэнэмиичэскэй пуорум 2026 с. Владивостокка балаҕан ыйын 1-4 күннэригэр ыытыллыаҕа.
Тэрийээччи: Росконгресс Пуонда РФ Бырабыыталыстыбатын кытта. ВЭФ официальнай саайта: https://forumvostok.ru/.
