РФ бырабыыталыстыбатын бэрэссэдээтэлин солбуйааччы – РФ президенин УИФУо-ка боломуочуйалаах бэрэстэбиитэлэ Юрий Трутнев салалтатынан тохсунньутааҕы истиилэр түмүктэннилэр. Уһук Илин регионнарын баһылыктара 2025 сыллааҕы үлэ түмүгүн уонна бу сылга тутаах соруктары иһитиннэрдилэр. Саха сиригэр сыһыаннаах ханнык боппуруостарга дойду таһымнаах салайааччы болҕомтотун уурбутун Ил Дархан Айсен Николаев тохсунньу 28 күнүгэр “Якутия, вперед!” биэриигэ эттэ.
«Ааспыт сыл Уһук Илиҥҥэ уопсайынан куһаҕана суох буолла: сайдыы тэтимэ Россия орто регионнарыттан үрдүк, инвестиция киириитин, экономика үүнүүтүн көрдөрүүлэрэ уо.д. а. Саха сирэ валовай региональнай бородуукта, бюджет дохуотун, олох уһуна, өлүү аҕыйааһына уонна демография көрдөрүүлэринэн Уһук Илин лидерэ буолар. Биһиги ситиһиилэрбитин Юрий Трутнев үрдүктүк сыаналаата. Онуоха 2026 сылга экономика уонна социальнай көрдөрүүлэр үрдээһиннэрин былааннара олус улахан», — диэн Айсен Николаев бэлиэтээтэ.
Өрөспүүбүлүкэ баһылыга тыл этиитигэр хомунаалынай комплекс тарыыптарын уонна субсидияларын үрдэтиини кытта сибээстээх кыһалҕалаах боппуруостары эмиэ бэлиэтээтэ.
«Юрий Петрович кыһалҕа регионнар таһымнарыгар хаалбатын туһугар сорудахтары биэрдэ, онон федеральнай таһымҥа бу кыһалҕалары быһаарыахтара. Уһук Илиҥҥэ уонна Саха сирин инники кэскиллээх сайдыыларын хааччыйар дьаһаллар ылыллыахтара», – диэтэ регион баһылыга.
