Саха сиригэр таба ытыыга аныгылыы «стрелковай» комплекс тэриллэрэ былааннанар. Тутуу идеятын РФ бырабыыталыстыбатын бэрэссэдээтэлин солбуйааччы-РФ бэрэсэдьиэнин боломуочуйалаах бэрэстэбиитэлэ Юрий Трутнев өйөөтө, диэн СИА кэпсиир.
Санатан эттэххэ, Владимир Путин РФ бэрэсэдьиэнин дьаһалтатын салайааччытын бастакы солбуйааччы Сергей Кириенко дойду үрдүнэн ыччаты байыаннай- патриотическай иитиигэ анал киин биир кэлим ситимин тэрийэр туһунан этиитин өйөөбүтэ. Пилотнай кииннэр дойду 10 регионугар киириэхтэрэ. Инникитин бары регионнарга итинник кииннэр тэриллэллэрэ былааннанар.
«Дьокуускайга баар «стрелковай» комплекс Арассыыйа байыаннай-патриотическай иитиитин уопсай систематын элеменнэриттэн биирдэстэрэ буолуон сөп. Буойуннары бэлэмнээһин систематын үчүгэй эбэтэр куһаҕан диэн сыаналыыр сыыһа, кини бастыҥ эбэтэр өссө ордук үчүгэй буолуон сөп. Саха сирэ Сэбиэскэй сойуус саҕаттан снайпер-геройдарынан куруук аатырара. Биһиги кинилэринэн киэн туттабыт. Онон, өрөспүүбүлүкэҕэ таба ытыыга үрдүк таһымнаах аныгы «стрелковай» комплекс тэриллиитэ биһиэхэ үрдүк кылаастаах байыастары бэлэмниир кыаҕы биэриэ диэн эрэнэбин. Онон биһиги Айсен Сергеевичтыын бу бырайыагы өйүөхпүт уонна дойду иннигэр турар соруктары быһаарарга көмөлөһүөхпүт», — диэтэ Юрий Трутнев.
РФ полпреда Юрий Трутнев бүгүн Дьокуускайга үлэлиир. Кини «үлэ кыбаартала» креативнай кластерга сырытта, ону тэҥэ Уһук Илиҥҥэ уонна РФ Арктическай зонатыгар тарифтары тэҥниир механизмнары оннунан хаалларар туһунан сүбэ мунньаҕы ыытта.
